БЮДЖЕТТЕН 23,4 МЛРД ТЕҢГЕ ҮНЕМДЕЛДІ

Шымкентте мемлекеттік бюджеттен 23,4 млрд теңге үнемделді. Қаражат бюджет шығыстарын қайта қарау, негізсіз жоспарланған шығындарды қысқарту және мемлекеттік сатып алулардағы тәуекелдерді ерте анықтау нәтижесінде сақталған. Бұл ретте экономикалық қауіпсіздікті қамтамасыз ету және бюджет қаражатының тиімсіз жұмсалуына жол бермеу бағытындағы алдын алу жұмыстары күшейтілген.

Бюджет қаражатының әр теңгесі нақты нәтижеге жұмыс істеуі тиіс. Осы мақсатта мемлекеттік органдардың қызметіне тұрақты талдау жүргізіліп, бюджет шығыстары мен мемлекеттік сатып алуларға мониторинг жұмыстары жасалады. Сонымен қатар тәуекелі жоғары жобалар анықталып, қаржылық заң бұзушылықтардың алдын алуға басымдық берілуде. Бұл туралы баспасөз брифингте теркеп тексеру департаментінің басшысы баяндады.

Сонымен қатар, шаһарда өткен жылы анықталған 84 қылмыстық іс бойынша мемлекетке келтірілген залал көлемі 15,9 млрд теңгені құраған. Оның 7,5 млрд теңгесі мемлекетке қайтарылды. Бұл көрсеткіштер қаржылық тәуекелдерді қылмыс жасалғаннан кейін емес, бастапқы кезеңде анықтаудың маңызын көрсетеді.

Экономикалық қауіпсіздіктің басты өлшемі – анықталған құқық бұзушылықтардың саны емес, алдын алынған шығындардың көлемі. Себебі дер кезінде тоқтатылған тиімсіз шығын – бюджетте қалған қаражат және халық игілігіне бағытталатын қосымша мүмкіндік. Бұл қаржы әлеуметтік жобаларды іске асыруға, инфрақұрылымды дамытуға және мемлекеттік қызметтердің сапасын арттыруға жұмсалуы мүмкін. Бүгінде тергеп тексеру департаменті мемлекеттік органдармен бірлесіп тәуекелдерді азайтуға және қаржылық тәртіпті күшейтуге басымдық беруде.