100% ИНФРАҚҰРЫЛЫММЕН ҚАМТЫЛҒАН АУДАН

Абай ауданы инфрақұрылыммен 100% ға қамтылды. Бұл туралы баспасөз брифингінде 6 айдығы жұмыстарды саралаған аудан әкімі айтты. Дегенмен, күн санап көркейіп, дамып келе жатқан ауданда тұрғындарды алаңдатқан мәселе  де жоқ емес. Мұны әкім Шәкір Сұлтанхан ашық айтты.

2026 жылдың бірінші жартыжылдығында Абай ауданында әлеуметтік-экономикалық даму бағытында ауқымды жұмыстар атқарылған. Бүгінде ауданда 27 елді мекенде 55 мыңнан астам жеке және 350 көпқабатты тұрғын үй бар. Аудан аумағындағы 1274 көше мен 230 әлеуметтік нысанның инфрақұрылыммен қамтылу деңгейі жоғары: ауыз су, электр жарығы және табиғи газбен қамту көрсеткіші 100 пайызға жеткен. Дегенмен, Жиделі, Ақжайық және Нұршуақ шағын аудандарындағы жаңақұрылыс аумақтарында газ желісіне қосылмаған бірқатар тұрғын үй мен жер учаскелері бар.

Шәкір Сұлтанханның айтуынша, Абай ауданында көше жарықтандыру мәселесіне ерекше назар аударылып, бүгінде елді мекендердегі көшелер толық жарықтандырылған. Бұл жұмыстар тұрғындардың қауіпсіздігін арттырып, елді мекендердің көркі мен қолайлылығын жақсартуға мүмкіндік береді. Жиынның жалғасы БАҚ өкілдерінің сұрақтарына жауап берумен жалғасты.

2026 жылдың бірінші жартыжылдығындағы Абай ауданының әлеуметтік-экономикалық даму қорытындылары баяндалған жиында алдағы жылу маусымына дайындық барысы да пысықталды. Атап айтқанда, 32 мектеп, 9 балабақша және 13 медициналық ұйымның алдағы жылу маусымына дайындығы пысықталатыны айтылды.