Әл-Фараби ауданында жауын-шашын кезінде су жиналып, ирригациялық жүйелердің дұрыс жұмыс істемеуі тұрғындарды алаңдататын өзекті мәселелердің бірі. Бұл мәселе жыл сайын қайталанып, кей көшелерде жаңбырдан кейін жүріп-тұру қиындайтын. Негізгі себептердің бірі – арық-атыздардың уақытылы тазаланбауы және ирригациялық жүйелердің талапқа сай болмауы. Мәселені шешу мақсатында биыл бірқатар көшеде жаңа арық жүйелерін салу жұмыстары қолға алынған. Қазір 11 көшеде жұмыс толық аяқталса, тағы 3 көшеде құрылыс жалғасып жатыр.
Әл-Фараби ауданында бүгінде 17 шағын аудан және 1 елді мекен бар. Мұнда 262 мыңнан астам тұрғын тұрады. Аудан аумағында инфрақұрылымды жақсарту бағытындағы жұмыстар жыл сайын жалғасып келеді. 2025 жылы 113 көшеге асфальт төселіп, жол жабындары жаңартылды. Ал биыл тозығы жеткен 49 көшені жаңарту жоспарланған. Қазіргі таңда оның 30-ында асфальт төсеу жұмыстары толық аяқталып, 3 көшеде жұмыс жалғасуда.
Ирригациялық жүйелерді жаңарту да назардан тыс қалған жоқ. 2025 жылы аудан аумағындағы 17 көшеге арық жүйелері орнатылды. Биыл тиісті басқарма тарапынан тағы 27 көшеде ирригациялық арық жүйесін салу жоспарланған. Сонымен қатар, «Әл-Фараби» КММ тарапынан 32 мекенжайда арық жүйесін салу көзделген. Бүгінде 11 көшедегі жұмыстар толық аяқталды.
Тұрғындар көп жылдан бері көтеріп келген мәдениет үйі мәселесі де шешімін тапты. Бұл мәселе қала әкімі Ғабит Сыздықбековтің тұрғындармен көшпелі кездесуінде көтеріліп, тиісті тапсырмалар берілген болатын. Тапсырмалардың нәтижесінде және демеушілердің қолдауымен 11,6 сотық жер телімінде жаңа мәдениет үйі бой көтерді. Нысанның құрылысын «BKN GROUP» жауапкершілігі шектеулі серіктестігі жүргізді. Құрылыс жұмыстары 2026 жылғы 10 сәуірде басталып, небәрі екі ай ішінде толық аяқталды.
Ал тұрғын үй қорын жаңғырту жұмыстары да кезең-кезеңімен жүзеге асырылуда. Биыл модернизация бағдарламасы аясында аудан бойынша 23 көпқабатты үй қамтылған. Қазіргі таңда оның 16-сында жөндеу жұмыстары толық аяқталды. Қалған 7 үйде жаңғырту жұмыстары жалғасуда. Сонымен қатар, реновация жобасы аясында биыл 4 мекенжайда құрылыс жұмыстары жүргізіліп жатыр.
Осылайша, Әл-Фараби ауданында инфрақұрылымды жаңарту, жол сапасын жақсарту, ирригациялық жүйелерді ретке келтіру және тұрғын үй қорын жаңғырту жұмыстары қатар жүргізілуде. Негізгі мақсат – аудан тұрғындары үшін қауіпсіз әрі қолайлы орта қалыптастыру.
