Шымкентте саябақтар мен көшелерде қаңғыбас иттер қаптаған. Мамандардың айтуынша, мәселенің бір ұшы — жануарларды бақылаусыз қалдыратын тұрғындардың өзінде. Дендрологиялық саябақта иттің адам тістеу дерегі тіркелгелі бері қалада қаңғыбас жануарларды аулау мен бақылау жұмыстары күшейтілді. Мәселен, осы маңдағы үйлердің бірінен бірден 20 ит табылған. Көршілерінің үстінен түсірген арыз-шағымы да аз емес. Ал мұндай жағдайлардың алдын алу үшін биыл қала аумағында 40 мың ит-мысықты аулау жоспарда бар. Осыған байланысты бюджеттен 124 млн қаржы бөлінген
Жыл басынан бері қалада 30 мыңға жуық ит-мысық ауланған. Қазір шаһарда иесі бар 6 мыңға жуық ит тіркеліп, барлығына чип салынған. Ұсталған жануарлар 14 күн бақылауда болады. Алғашқы үш күнде жағдайы қалыпты болса, ұрықсыздандырылып, кейін ұсталған жеріне қайта жіберіледі. Ал ауруы немесе ақауы анықталған жағдайда, жансыздандыру жұмыстары жүргізіледі.
Ал Ақтас шағынауданындағы жануарларды уақытша ұстау орнында ауланған иттер арнайы тәртіппен күтіледі. Мұнда жануарды тамақтандыруға 1 күнге 600 теңге қарастырылған. Яғни бір иттің көшеден ұсталғаннан кейінгі тағдыры тек аулаумен шектелмейді — оны ұстау, азықтандыру және әрі қарайғы жағдайын бақылау да бюджет шығынын талап етеді.
