Жыл сайын әлеуметтік аз қамтылған отбасының мектеп қабырғасында оқитын балаларына білім күні қарсаңында керек-жарағын қамту үшін бір реттік көмек түрі көрсетіледі. Оны алу үшін әлеуметтік жағдайын дәлелдеудің түрлі жолын іздегендер де кездесті. Енді бюджеттен берілетін көмекті «айламен» алудың жолы қиындай түспек. Себебі арнайы қаржылық және материалдық көмекке мұқтаж отбасыны анықтау енді адамның сөзіне емес, цифрлық жүйедегі нақты деректерге сүйенеді. Тіпті өтініштің қабылдануынан бастап, қаражаттың мақсатты жұмсалуына дейін бақылауда болады.
Жаңа тәртіп бойынша көмек тағайындау кезінде мектеп директорлары мен білім беру ұйымдарының ұсыныстары да ескеріледі. Ал өтініштің өзі «QOSYMSHA» ақпараттық жүйесі арқылы электронды қабылданып, отбасының әлеуметтік жағдайы автоматты түрде тексеріледі. Жүйе ақпараттық базадағы мәліметтерді саралап, талапқа сай келетін-келмейтінін анықтайды.Ал кімдер бұл көмекті алуға құқылы? Айта өтейік. Атаулы әлеуметтік көмек алатын отбасылардың балалары. Атаулы әлеуметтік көмек алмайтын, бірақ жан басына шаққандағы табысы ең төмен күнкөріс деңгейінен төмен отбасылардан шыққан балалар. Отбасында тәрбиеленіп жатқан жетім және ата-анасының қамқорлығынсыз қалған балалар. Төтенше жағдай салдарынан шұғыл көмекке мұқтаж отбасылардың балалары. Ал бесінші санатқа білім беру ұйымының алқалы басқару органы айқындайтын өзге де білім алушылар мен тәрбиеленушілер кіреді.
Жүйенің сүзгісінен өтпей қалғандар аз емес. «QOSYMSHA»-ға 78 мыңнан астам өтініш түскен. Оның 18 927-сі әлі қаралуда. 9 612 өтініш бойынша көмек тағайындалып, төлем күтілуде. Ал 50 004 өтініш бойынша көмек беруден бас тартылған. Оның басым бөлігінде екінші санатқа жататындығы расталмаған. Яғни отбасының нақты табысы белгіленген мөлшерден жоғары болуы немесе өтініш иесінің аталған бес санаттың ешқайсысына сәйкес келмеуі себеп болуы мүмкін.
