Есірткі саудасы әлі де өзекті. Кезінде қолма қол саудада болса бүгінде бұл қылмыс түрі онлайн форматқа көшкен. Яғни интернет арқылы сату түрі көбейген. Одан қала берді кейбіреулер оны өз үйінде өсіріп, шағын өндіріске айналдырған. Мұның бәрі әрине өз кезегінде күресті біршама күрделендіреді. Дегенмен, осындай жасырын әрекеттердің жолын кесу үшін полицейлер жедел қимылдап, үйме-үй тексеру жұмыстарын жүргізуде. Қажет болса, дрондарды да іске қосады.
Мұны Шымкенттегі соңғы жедел шаралардың өзі аңғартады. Полиция есірткі өсімдігін іздеу барысында тек жерді ғана емес, әуеден де бақылауға алған. Дрон арқылы жүргізілген барлау кезінде қала орталығындағы жеке тұрғын үйлердің бірінен аса ірі көлемдегі есірткі өсімдігі анықталған. Бұл – есірткі бизнесінің қаншалықты жасырын сипат алғанын көрсетеді. Ал есірткіні үй жағдайында өсірудің тәсілі бұдан да күрделене түскен. Табиғи ортаға сенбей, жасанды жағдай жасап, арнайы орын әзірлегендер де бар. Тұран ауданында анықталған «фитозертхана» – соның бір мысалы. Мұндай деректер есірткімен күресте тек дайын өнімді іздеумен шектелмей, оның өндіріс көздерін анықтаудың маңызын көрсетеді.
Бірақ есірткінің ең қауіпті алаңдарының бірі қазір – виртуалды кеңістік. Мұнда сатушы мен сатып алушы бір-бірін көрмейді, ал тауардың орны мен төлемі жасырын тәсілдермен ұйымдастырылады. Сондықтан полиция үшін ендігі міндеттердің бірі – көшедегі сауданы ғана емес, интернеттегі көлеңкелі желіні де бақылау. Бұл бағытта атқарылып жатқан жұмыстар туралы маманның өзінен тыңдайық. Есірткі бизнесінің тағы бір ерекшелігі – оның бір қаламен немесе бір облыспен шектелмеуі. Заңсыз өнімнің бір бөлігі өзге өңірлерден жеткізіледі, ал кей жағдайда оның өндірісі де басқа жерде ұйымдастырылады. Сондықтан мұндай қылмыстың жолын кесу үшін өңірлер арасындағы өзара іс-қимылдың маңызы зор. Шымкент полицейлері жүргізген операциялардың бірқатарында дәл осындай байланыстардың жолы кесілген.
