Шымкентте тағы 40 отбасы баспаналы болды. Салтанатты рәсімге қала әкімі қатысып, жаңа пәтер иелерін қуаныштарымен құттықтады. Заманауи тұрғын үйлерден берілген баспаналар мемлекеттік бағдарламалар мен жеңілдетілген ипотека аясында табысталды. Бұл бастама тұрғындарды баспанамен қамтып, олардың өмір сүру сапасын арттыруға бағытталған маңызды қадам.
Көпқабатты үйлер Бозарық шағын ауданынан 20 жылға дейінгі мерзіммен несиелік бағдарлама бойынша ұсынылған. Мұндағы тұрғын үйді алушылардың бәрі де төлем қабілеттері расталған азаматтар. Бұл жайында тұрғын үй басқарма басшысының міндетін атқарушы Көпжан Төлебаев баяндады.
Жаңа пәтерлер төмен пайыздық мөлшерлемемен, берілген. Баспана иелері бұл қуанышты сәтті ұзақ күткен. Солардың қатарында Тәттігүл Қылышқызы мен Мөлдір Бейсенова да бар. Пәтерлер мемлекет қолдауымен, тиімді әрі қолжетімді шарттар арқылы ұсынылған. Өз шаңырағына қол жеткізген жандар үшін бұл – үлкен қуаныш.
