Отандық брендтерді бір алаңға тоғыстырған «Terra Fashion» жобасы биыл бесінші маусымын өткізді. Бұған дейін жабық ғимараттарда ұйымдастырылып келген жәрмеңке бұл жолы ашық аспан астында өтті. Орталық саябақта өткен екі күндік шараға сән индустриясының өкілдерімен қатар, азық-түлік және басқа да отандық өнім өндірушілер қатысты. Ұн, су, балмұздақ сынды күнделікті тұтынатын тауарлардан бастап, танымал киім, аксессуар және сәндік бұйымдарға дейін – жәрмеңкеде көпшіліктің көңілінен шығатын түрлі өнім ұсынылды. Мұндағы басты мақсат – жергілікті кәсіпкерлерді қолдап, олардың өнімін көпшілікке таныту. Жобаға қатысушылардың қатарында өз кәсібін енді дамытып келе жатқан жас кәсіпкерлер де, нарықта өзіндік орнын қалыптастырған танымал брендтер де бар. Ұйымдастырушылардың айтуынша, жыл сайын жобаға қатысуға ниет білдіретіндердің саны артып келеді. Бұл – отандық өнімге деген қызығушылықтың жоғары екенін көрсетеді.
Жәрмеңке – кәсіпкерлер үшін өнімін таныстырып қана қоймай, тұтынушымен тікелей байланыс орнатуға мүмкіндік беретін тиімді алаң. Әсіресе жергілікті брендтер үшін мұндай жобалардың маңызы зор. Себебі тауарды жарнамалаумен қатар, келушілердің пікірін тыңдап, сұранысты саралауға мүмкіндік бар. Екі күн бойы орталық саябаққа жиналған тұрғындар түрлі өнімдерді аралап, өзіне қажетті тауарды таңдап, отандық кәсіпкерлердің еңбегімен танысты. Ал кәсіпкерлер үшін бұл – брендін дамытуға жасалған тағы бір қадам. Сапалы өнім, жаңа брендтер мен еркін сауда алаңы. «Terra Fashion» жобасы отандық кәсіпкерлерді қолдап қана қоймай, жергілікті өнімнің мүмкіндігін көпшілікке көрсетіп келеді. Ұйымдастырушылар алдағы уақытта жобаның ауқымын кеңейтіп, қатысушылар қатарын арттыруды жоспарлап отыр.
