ЖОҒАРЫ БІЛІМ БЕРУДЕГІ ЖАҢА БЕТБҰРЫС

Елімізде жаңа Конституцияның ресми күшіне енуіне орай Жұмабек Тәшенов атындағы университетте дөңгелек үстел өтті. Басқосуда Ата заңда айқындалған білім беру, ғылым және адами капиталды дамыту бағыттары талқыланды. Бүгінде білімді ұрпақ тәрбиелеу – уақыт талабы. Осыған сәйкес жоғары оқу орны заманауи технологияларды игеруге басымдық беріп, жасанды интеллект мектебін алғашқылардың бірі болып ашқан.Жалпы 1 шілдеден бастап жоғары оқу орындарында бірқатар жаңашылдықтар күшіне енген. Айта кетсек Еліміздегі 95 университетте жасанды интеллект пәндері оқытыла бастаған. Солардың қатарында Жұмабек Тәшенов атындағы университет те осы салаға басымдық беріп, жетекші жоғары оқу орындарының қатарынан көрініп отыр. Іс-шара барысында қатысушылар Конституцияда белгіленген стратегиялық міндеттерді жүзеге асыруда ғылым мен білімнің, сондай-ақ озық технологияларды меңгерген білікті мамандар даярлаудың маңызына да тоқталып өтті. Сонымен қатар жиында студенттер мен оқытушыларға арналған «ChatGPT Edu» платформасының 165 мың лицензиясы берілгенін тілге тиек етті. Бұдан бөлек, еңбек нарығының сұранысына сай 1,5 мыңнан астам білім беру бағдарламасы жаңартылған. Сондай-ақ 2026–2027 оқу жылына 89 мыңнан астам мемлекеттік білім гранты бөлінетіні де айтылды.