ЖАҢА КОНСТИТУЦИЯНЫҢ МАҢЫЗЫ САРАЛАНДЫ

 Еліміздің құқықтық жүйесінде маңызды өзгеріс. 1 шілдеден бастап Конституцияның жаңа редакциясы ресми түрде күшіне енеді. Осы тарихи оқиғаға орай М.Әуезов атындағы Оңтүстік Қазақстан университетінде ғылыми-сараптамалық жиын өтті. Онда жаңа Ата заңға енгізілген өзгерістер мен негізгі нормалар кеңінен түсіндірілді.Оқу ордасында өткен ғылыми жиынға заң саласының оқытушылары, сарапшылар мен студенттер қатысты. Басқосудың басты мақсаты – жаңа Конституцияда айқындалған демократиялық қағидаттар мен конституциялық құндылықтарды кеңінен насихаттап, қоғамда заң үстемдігі қағидатын нығайту. Іс-шара барысында заң ғылымдарының докторы Айсана Сман жаңа құжатта цифрлық технологиялардың қарқынды дамуы, жасанды интеллектіні құқықтық реттеу және ұлттық мүддені қорғау мәселелері де жан-жақты қамтылғанын жеткізді.Сондай-ақ жиын барысында саясаттану кафедрасының аға оқытушысы, магистр Жандос Сәрсенбеков өз сөзінде мемлекеттік басқару жүйесіне қатысты енгізілген өзгерістерге тоқталып, олардың елдің саяси дамуына ықпалын атап өтті. Іс-шара соңында спикерлер жас ғалымдарды Конституцияның жаңа нормаларын ғылыми тұрғыдан жан-жақты зерттеуге шақырып, оның құқықтық ғылымды дамытудағы маңызын ерекше атап өтті.