Қала әкімі кезекті есептік кездесуінде Қаратау ауданы тұрғындарының мәселелерін тыңдады. Жол сапасы, қоғамдық көлік тапшылығы мен әлеуметтік түйткілдер халықтың басты талқысына айналды. Тұрғындар өздерін толғандырған мәселелерді көтеріп, бірқатар ұсыныс-пікірлерін жеткізді.
Кездесу Қаратау ауданына қарасты Мирас шағынауданында өтті. Жиын барысында тұрғындар кәріз жүйесіне қатысты проблемаларды айтып, балалар ойын алаңшаларының тозығы жеткенін және оларды жаңарту қажеттігін жеткізді.
Сондай-ақ тұрғындар қоғамдық көлік мәселесін көтерді. Олардың айтуынша, кейбір бағыттар бойынша автобустар мүлде қатынамайды. Соның салдарынан тұрғындар қажетті жерлеріне жаяу баруға мәжбүр. Бұл әсіресе жұмысқа, мектепке және әлеуметтік нысандарға қатынау кезінде қиындық туғызуда.
Кездесуде газ мәселесі де сөз болды. Тұрғындардың айтуынша, бес жыл бұрын тартылған газ құбырлары әлі күнге дейін іске қосылмаған.
Жауапты мамандардың мәліметінше, Ұлағат шағынауданында 2018 жылы жүргізілген газ құбырының сапасы талапқа сай болмаған. Ал қала әкімі аталған мәселені шешу бағытында келесі жылы тиісті жұмыстар жүргізілетінін атап өтті.
