Бірі – шекараны күзетеді, енді бірі – тілсіз жаумен күреседі. Шымкенттен тағы бір топ жас сарбаз Отан алдындағы борышын өтеуге аттанды. Бұл жолы олар Төтенше жағдайлар министрлігіне қарасты әскери бөлімдерде қызмет етеді. Салтанатты рәсімде сарбаздарға ақ жол тілеп, елге адал қызмет ету аманаты айтылды.
Әскери оркестрдің үні, ата-ананың ақ батасы, сарбаздардың жігерлі жүздері. Қалалық шақыру пунктінде өткен салтанатты рәсім ерекше көңіл-күймен басталды. Жамбыл облысындағы Төтенше жағдайлар министрлігіне қарасты әскери бөлімге 20 жас сарбаз аттанды. Оларды қорғаныс істері жөніндегі департамент өкілдері, ардагерлер мен туған-туыстары шығарып салды.
Төтенше жағдайлар саласындағы әскери қызмет – үлкен жауапкершілік. Себебі азаматтық қорғаныс әскери бөлімдері табиғи апат пен түрлі төтенше жағдайлардың салдарын жоюға әрдайым дайын тұрады. Мамандардың айтуынша, сарбаздардың сапалы даярлығына барлық мүмкіндік қарастырылған. Ал қызметін аяқтаған жастарға азаматтық қорғаныс саласында еңбек жолын жалғастыруға жол ашық.
