ОҚУШЫЛАРҒА БАҒЫТ-БАҒДАР БЕРІЛДІ

Шымкентте «2000 мектеп» акциясы жалғасуда. Осы орайда «Жол активтері сапасының ұлттық орталығы» ШЖҚ РМК-ның Шымкент қалалық филиалы №36 жалпы орта мектебінің жоғары сынып оқушыларымен кездесті.
Елімізде жол саласы мамандарына сұраныс жыл сайын артып келеді. Осыған байланысты қандай мамандық таңдарын білмей жүрген жастарға «Жол активтері сапасының ұлттық орталығы» ШЖҚ РМК Шымкент қалалық филиалының мамандары кәсіби бағыт-бағдар берді.

Шымкент қаласындағы №36 жалпы орта мектебінің түлектерімен кездескен филиалдың сынақ зертханасының сарапшысы Нұрбол Нұрланұлы жол құрылысы саласының бүгінгі тыныс-тіршілігі туралы кеңінен айтып, жолшы мамандарға мемлекет пен мердігер мекемелер тарапынан жасалып жатқан қолдауларға тоқталды. Сонымен қатар жоғары әрі тұрақты жалақы, біліктілікті арттыруға арналған оқу-семинарлары мен тәжірибе алмасу жұмыстары жүйелі түрде ұйымдастырылатынын жеткізді.
Еркін форматта өткен кездесуде оқушылар өздерін толғандырған сауалдарын қойып, тұщымды жауап алды.
— Елімізде жол саласы мамандары жетіспейді. Оның басты себептерінің бірі – ақпараттың аздығы. Екіншіден, жастар бұл саланы қиын деп қабылдайды. Негізінде, мұнда аса қиын ештеңе жоқ. Құрылыс алаңындағы қиындықтар нысан пайдалануға беріліп, халықтың алғысын естіген сәтте ұмытылады. Біздің білім беру ұйымдарында кездесулер өткізудегі мақсатымыз – жастарды жол құрылысы саласына көптеп тарту және олардың техникалық мамандықтарға деген қызығушылығын арттыру, – деді Нұрбол Нұрланұлы.

Айта кетейік, «ҚазжолҒЗИ» АҚ мәліметінше, Қазақстанның жол саласында 1 500-ден астам маман тапшылығы тіркелген. Атап айтқанда, инженерлер, операторлар, арнайы техника жүргізушілері мен зертхана қызметкерлері жетіспейді.