ЭТНОС ӨКІЛДЕРІ ҚАЗАҚ ТІЛІНДЕ БАҚ СЫНАДЫ

«Өзге тілдің бәрін біл, өз тіліңді құрметте». Шымкентте дәстүрлі «Ана тілі және отбасы – 2026» байқауы қорытындыланды. Этнос өкілдері арасында ұйымдастырылған тағылымды сайыс биыл оныншы рет өткізілді. Мемлекеттік тілді насихаттауды мақсат еткен байқауға қаладағы 16 ұлттық мектептен екі мыңға жуық қатысушы қатысты.

Қалалық білім беру ұйымдары арасында өткен байқауға мемлекеттік тілді еркін меңгерген этнос өкілдерінен құралған командалар қатысты. Олардың қатарында мектеп оқушылары, ата-аналар мен педагогтер бар. Дәстүрлі түрде ұйымдастырылатын байқаудың негізгі мақсаты – қазақ тілінің мәртебесін арттыру, мемлекеттік тілдің этносаралық қатынастағы рөлін күшейту және жас ұрпаққа қазақ халқының салт-дәстүрі мен ұлттық құндылықтарын насихаттау.

 Этнос өкілдері арасында өткен байқау бес кезең бойынша ұйымдастырылды. Қатысушылар әр кезеңде өз өнерлері мен білімдерін ортаға салып, түрлі тапсырмалар арқылы сынға түсті. Байқау барысында қатысушылар қазақ тілінде еркін сөйлеп, мемлекеттік тілге деген құрметтің жоғары деңгейде екенін көрсетті. Әр кезең бойынша қатысушылардың өнері мен еңбегін бағалау үшін арнайы әділқазы алқасы құрылды. Байқау барысында ерекше дайындықпен көзге түскен мектептердің бірі – Ботабай Садықов атындағы №112 жалпы орта білім беретін мектебі. Аталған білім ордасынан 200-ге жуық оқушы, ұстаз және 15 шақты ата-ана қатысқан. Қатысушылар бар-жоғы үш күн ішінде дайындалғанына қарамастан, жоғары деңгейде өнер көрсетіп, көрерменнің ыстық ықыласына бөленді.

Сайыс қорытындысы бойынша қатысқан барлық мектептерге дипломдар мен бағалы сыйлықтар табысталды. Сонымен қатар, байқауды ұйымдастыруға атсалысқан қызметкерлер арнайы алғысхаттармен марапатталды. Ұйымдастырушылар мұндай байқаулар мемлекеттік тілдің қолданыс аясын кеңейтіп қана қоймай, ұлттар арасындағы достық пен бірлікті нығайтуға үлкен үлес қосатынын атап өтті.