ҚЫТАЙ ОРТАЛЫҒЫ АШЫЛДЫ

«Бір белдеу – бір жол» бастамасы аясында Шымкентте жаңа халықаралық орталық ашылды. М. Әуезов атындағы Оңтүстік Қазақстан университетінде бизнес орта қызметтерін дамытуға бағытталған Қытай орталығы өз жұмысын бастады. Жоба Қазақстан мен Қытай арасындағы білім, ғылым және кәсіпкерлік салаларындағы ынтымақтастықты жаңа деңгейге көтеруді көздейді. Оқу ордасының басшылары Қытайдан келген қонақтарды арнайы қазақы әнмен қарсы алып, орталықты салтанатты түрде ашты. Бұл, өз кезегінде, халықаралық бірлескен бастамаларды жүзеге асырып, екі ел арасындағы академиялық және іскерлік байланысты нығайтпақ.

Іс-шараға Қазақстан мен Қытайдың жоғары оқу орындарының өкілдері, халықаралық серіктестер мен сарапшылар қатысты. Жиын барысында тараптар екі ел арасындағы білім беру, ғылым және кәсіпкерлік салаларындағы ынтымақтастықты кеңейту мәселелерін талқылады. Осы бірлескен жобаның негізгі бастамашысы ретінде Northwest University of Political Science and Law жанындағы «Бір белдеу – бір жол» бизнес ортасын зерттеу институты Орталық Азиядағы бизнестің құқықтық зерттеулеріне үнемі басымдық беріп келеді. Бұл туралы ғылыми зерттеу институтының жетекшісі мәлімдеді.

Жиын барысында халықаралық жобаларды бірлесіп жүзеге асыру, академиялық ұтқырлықты дамыту бағытындағы бастамалар сөз болды. Бұл, өз кезегінде, Қазақстан мен Қытай арасындағы ынтымақтастықты нығайтпақ.