27 ҚҰНДЫ ҚҰЖАТ ЖАРЫҚ КӨРДІ

Тарих жаңғырып, тың деректер қайта сөйлей бастады. XVIII ғасырдағы қазақ даласының беймәлім беттері Иран архивтерінен табылған құнды қолжазбалар арқылы қайта зерделенді. Иран Ислам Республикасының архив қорынан алынған 27 сирек құжат өткеннің көмескі тұстарын айқындап, сол дәуірдің саяси, мәдени және рухани тынысын жаңа қырынан танытты.

Көне жазбаларда қазақ даласының халықаралық байланыстары мен ел ішіндегі тарихи үдерістер нақты деректермен көрініс табады. Бұл құжаттар – ұлт тарихының олқылықтарын толықтырып, ғылыми айналымға тың серпін беретін бірегей мұра. Игі шараға Иран мемлекетінің Қазақстандағы ресми өкілдері арнайы қатысып, мәдени бағдарламаның көркін қыздырды. Жиында көрерменге көгілдір экран арқылы тарихи деректер көрсетіліп, ерекше әсер сыйлады.

Айта кетейік, бұл бастама алдағы уақытта өз жалғасын табады. Нақтырақ айтқанда, жоба аясында көрме мен мәдени бағдарлама еліміздің өзге өңірлерінде де ұйымдастырылып, көрермен назарына ұсынылмақ. Мұндай бастамалар Қазақстан мен Иран арасындағы мәдени байланысты нығайтып, екі елдің тарихи-рухани мұрасын кеңінен танытуға мүмкіндік береді.