ӘЛЕМДІК ДОДАДАН — ТАРИХИ ҚОЛА

Оңтүстік өңірі үшін тарихи жеңіс. 18 жылдан кейін қазақстандық татами шеберлері әлемдік додада қола жүлде жеңіп алды. Осылайша Шымкенттік спортшы Нодира Ахмедова Қытайдың Уси қаласында өткен әлем чемпионатында үздік үштікке ие болды. Жеңімпазды әуежайда жанкүйерлер мен жақындары зор қошеметпен қарсы алды.

Қытайдың Уси қаласында өткен әлем чемпионатында қазақстандық таеквондошы, Шымкент қаласының спортшысы Нодира Ахмедова ел намысын абыроймен қорғап, 49 келіге дейінгі салмақ дәрежесінде қола медаль иегері атанды. Бұл жүлде — Қазақстан құрамасы үшін аталмыш чемпионаттағы алғашқы әрі тарихи жеңіс. Чемпионды жақындары мен қала халқы әуежайдан сән салтанатпен күтіп алып, құшақ-құшақ гүлдерін  табыстады.

Татами шебері Бразилия, Канада және Тайланд спортшыларын жеңіп, жартылай финалға дейін жетті. Тек Қытайлық Тайпей өкіліне жол беріп, қоладан алқа тақты. Бұл — оның мансабындағы ең ірі жетістік әрі Қазақстан әйелдер таеквондосы үшін тарихи жеңіс. Себебі, бұған дейін мұндай нәтиже 2007 жылы ғана тіркелген еді. Осылайша, спортшы 18 жыл өткен соң елге әлемдік медальды қайта әкелді.

Шымкент қаласының таеквондо мектебінен түлеп ұшқан Нодира Ахмедова бүгінде ел үмітін ақтаған дара спортшыға айналды. Ол өз еңбегі мен табандылығының арқасында қазақ спортының жаңа жарқыраған жұлдызы ретінде танылып келеді.