Шымкент қаласындағы Бадам су қоймасында әскери міндеттілер мен аумақтық әскерлердің жеке құрамының қатысуымен он күндік жиындардың қорытынды кезеңі өтті. Бұл ауқымды оқу-жаттығулар төтенше жағдай кезінде стратегиялық нысандарды қорғау, қауіп-қатерлердің алдын алу және ведомствоаралық өзара іс-қимылды жетілдіруге бағытталды.
Оқу-жаттығу барысында қазіргі заманға тән қауіптерге қарсы әрекет ету машықтары пысықталды. Әлеуметтік тұрақсыздық пен диверсиялық әрекеттерді бейтараптандыру, стратегиялық нысанды қорғау, келіссөз жүргізу және тәртіп бұзушыларды ұстау жаттықтырылды.
Әскери міндеттілерден құралған аумақтық қорғаныс ротасы полиция департаментінің қарамағына беріліп, ортақ күшпен нысанды қорғау ісі ұйымдастырылды. Олар:
- диверсиялық-барлау тобының су арқылы шабуылына,
- қарулы топтың стратегиялық жабдықты басып алу әрекетіне,
- белгісіз көлікпен жасалған тосын шабуылға тойтарыс берді.
Арнайы бөлімшелердің («Арлан» тобы) қатысуымен шартты қарсыластың әрекеттері толықтай бейтараптандырылды. Сонымен қатар алғашқы медициналық көмек көрсету, өрт сөндіру және ұсталғандарды жеткізу тапсырмалары да сәтті орындалды.
Оқу-жаттығудың қорытындысында аумақтық қорғаныс бригадасының командирі полковник Бақытжан Әшімов:
«Бұл жаттығулар аумақтық әскерлердің, полицияның, ІІМ арнайы бөлімшелері мен әкімдіктің жоғары дайындық деңгейін көрсетті. Қатысушылардың тәжірибесі – өңір қауіпсіздігінің кепілі», – деп атап өтті.
Мемлекеттік маңызы бар нысан – Бадам су қоймасын қорғау арқылы әскерилер елдің тұрақтылығы мен бейбіт өмірін сақтаудағы өздерінің шешуші рөлін дәлелдеді.
Әскери міндеттілердің мәртебесі
Бұл жиынға 93 әскери міндетті тартылып, олар:
- мемлекеттік-құқықтық дайындық;
- тактикалық, арнайы және атыс машықтары;
- стратегиялық нысандарды қорғау мен қорғаныс тәсілдері бойынша білімін жетілдірді.
Маңыздысы – оқу-жаттығу кезінде әскери міндеттілердің негізгі жұмыс орны мен жалақысы сақталады, оларға қаржылай өтемақы, киім-кешек және тамақпен қамтамасыз ету қарастырылған.
Шымкентте өткен бұл оқу-жаттығулар – Қазақстанның қорғаныс қабілетін арттырудағы айқын қадам. Әскерилердің дайындық деңгейі мен ел қауіпсіздігіне деген жауапкершілігі – Тәуелсіздіктің тірегі, мемлекеттің беріктігінің кепілі.
