МЕГАПОЛИСТЕ СУДЬЯЛАР СПАРТАКИАДАСЫ БАСТАЛДЫ

Шымкентте Қазақстан Республикасы Судьялар одағының XI Спартакиадасының финалдық кезеңі басталды. Бұл спорттық шара – сот саласы қызметкерлерінің бірлігін арттырып, ынтымақтастығын нығайтатын дәстүрлі кездесу. Доданың басты мақсаты – салауатты өмір салтын дәріптеп, жоғары рух пен сергектікті насихаттау.

Биылғы Спартакиада сот жүйесінде еңбек етіп жүрген заң қызметкерлерінің арасындағы достық пен кәсіби байланысты нығайтып қана қоймай, спорт арқылы өзара түсіністік пен серіктестікті арттыруға бағытталған. Денсаулықты нығайту, ұжымдық рух қалыптастыру және белсенді демалысты насихаттау – осы бастаманың негізгі ұстанымдары. Салтанатты ашылу рәсімінде Қазақстан Республикасы Судьялар одағының төрағасы, Жоғарғы Сот пен жергілікті сот өкілдері, Шымкент қаласының әкімі сөз сөйлеп қатысушыларға сәттілік тілеп, бұқаралық спорттың маңызына тоқталды.

Жарыстар спорттың тоғыз түрінен өтуде. Олар – шағын футбол, волейбол, арқан тарту, бильярд, үлкен теннис, үстел теннисі, тоғызқұмалақ, шахмат және дойбы. Бұл сайыстар қатысушылардың физикалық дайындығын ғана емес, логикалық ойлау қабілеті мен шапшаңдығын да шыңдайды. Айта кетейік, биылғы додаға еліміздің барлық өңірінен келген сот жүйесі өкілдерінен құралған 20 команда қатысуда. Әр команда өз өңірінің намысын қорғап, жоғары деңгейдегі ойын өрнегін көрсетуде.

Судьялар одағының Спартакиадасы – тек спорттық жарыс емес. Бұл – әріптестердің жақынырақ танысуына, тәжірибе алмасуына, рухани байланысын нығайтуына жол ашатын маңызды алаң. Осындай игі дәстүрлер сот жүйесінің мәдениетін көтеріп, қызметкерлердің жан-жақты дамуына серпін береді. Қызу дода екі күнге созылады.