Арғымақтағы ағайынның ахуалы туралы көтерген мәселеге әкімдік құлақ асты. Әкім орынбасары кезекті брифингте мұнара мен тұрғын үйлердің арақашықтығы әсілінде 600 метр болуы тиіс екенін айтты. Сәрсен Абайұлының сөзінше, бұл жерде екі тараптың да кінәсі жоқ. Қазір жауапты мекемелер мәселені шешуге кіріскен. Дегенмен бұл түпкілікті шешім табылды дегенді білдірмейді.
Бейсенбіде өткен брифингте шаһардағы қоғамдық-саяси ахуалға қатысты тақырыптар қозғалды. Ретімен баяндасақ, алдымен алдағы уақытта өтетін мерекелік шаралар айтылды. Қарттар күніне орай 70 жастан асқан зейнеткерлерге 11 796 теңге көлемінде бір реттік әлеуметтік көмек көрсетілмек. Ал Еңбек күніне орай қалада бос жұмыс орындары жәрмеңкесі ұйымдастырылып, тұрғындарды тұрақты жұмысқа тарту көзделуде. Бұл шараға теріскейден келген делегаттар да қатысады. Ал енді Тұран ауданы Арғымақ шағын ауданындағы мәселеге оралсақ. Қаланың оңтүстік қақпасында орналасқан аумақта телемұнара бар. Соңғы бес жылда маңайына халық қоныстанып үлгерген. Дегенмен стратегиялық нысанға тым жақын тұрғандықтан тұрғындар баспаналарының құжатын заңдастыра алмай жүр.
Жиында мұнан өзге пиротехникалық құралдардың түнгі тыныштықты бұзуы ерекше айтылды. Қоғамдық тәртіп пен қауіпсіздікті қамтамасыз ету мақсатында шаралар жүргізіліп жатыр. Жыл басынан бері 123 жеке тұлғаға әкімшілік хаттама толтырылып, әрқайсысына 20 АЕК көлемінде айыппұл салынған. Жалпы 9 млн 672 мың теңгені құрайдя. Соған қарамастан түнгі 22:00-ден кейін рұқсатсыз отшашу ату деректері әлі де жалғасуда.
