Шымкентте қоғамдық кеңестің кезекті отырысы өтті. Кеңес жиналысында күн тәртібіне сәйкес Еңбекші және Қаратау аудандарының әкімдері, сондай-ақ білім мен кәсіпкерлік салаларының жетекшілері өз баяндамаларын ұсынды.Алғашқы баяндаманы еңбекші ауданының әкімі Досбол Есілбек баяндады. Жалпы Еңбекші ауданы 22 800 гектар аумақты алып жатыр. 18 тұрғын алап пен 11 шағынауданнан құралған Еңбекші ауданында 228 мыңнан астам халық тұрады. Аталмыш жиында аудан әкімі әлеуметтік және инфрақұрылымдық мәселелердің жүйелі түрде шешіліп жатқанын атап өтті.
Аудан әкімінің айтуынша, күз және көктем мезгілдерінде жауын-шашын суларының басып қалмауы үшін зерделеу жұмыстары жүргізілген. Нәтижесінде 57 мекен-жай анықталып, 2024 жылы 16 көшеге 4,9 шақырым ирригациялық арықтар орнатылған.
Баяндамадан соң еңбекші аудан әкіміне кеңес мүшелері ауданның экономикалық дамуы бойынша бірқатар сұрақтар қойды. Мінберге Қаратау ауданының әкімі шығып сөз алды. Ағымдағы жылы аудан көлемінде жоспарға сәйкес бірқатар ауқымды жұмыстар жүйелі түрде жүзеге асырылуда. Биылғы жылдың басты басымдықтарының бірі – ауданның инфрақұрылымдық әлеуетін арттыру және тұрғындардың өмір сүру сапасын жақсарту. Атап айтқанда, жолдарды жөндеу және жаңғырту, елді мекендерді абаттандыру, көшелерді жарықтандыру, санитарлық тазалықты қамтамасыз ету және көгалдандыру бағытындағы жұмыстар қарқынды жүргізілуде.
Қоғамдық талқылауда білім саласы бойынша да баяндама жасалды. Атап айтқанда 2025 жылы білім беру саласындағы нормативтік-құқықтық актілердің орындалуын мемлекеттік бақылау аясында бірқатар жұмыстар жүргізілген.
Қоғамдық кеңесте кәсіпкерлік саласы да сөз болды. Шымкент қаласының кәсіпкерлік және индустриалды-инновациялық даму басқармасының басшысы атап өткендей, қалада белсенді жұмыс істеп тұрған кәсіпорындардың саны 798-ге жеткен. Оның ішінде 696 кәсіпорын өңдеу өнеркәсібінде қызмет атқарады.
