ЖҮРЕК ОРТАЛЫҒЫНА — 25 ЖЫЛ

Шымкент жүрек орталығына – 25 жыл. Атаулы күнге орай орталықтың өз базасында ҚР Президенті жанындағы Ұлттық ғылым академиясының Перспективті кардиологиялық зерттеулер орталығы ашылды. Бұл жаңа ғылыми орталық елімізде жүрек-қан тамыр ауруларын зерттеу мен инновациялық емдеу әдістерін дамытуға тың серпін бермек.

Шымкент қаласында жүрек-қан тамыр ауруларын емдеуде озық технологияларымен және кәсіби мамандарымен танымал Жүрек орталығының 25 жылдық мерейтойы кең көлемде аталып өтті. Мерейлі шара аясында қала әкімі Ғабит Сыздықбековтің қатысуымен халықаралық деңгейдегі маңызды басқосу – «Инновациялар, технологиялар және әлемдік тәжірибе: жүрек хирургиясының болашағы — біздің қолымызда» атты Кардиохирургия конгресі ұйымдастырылды.

Ауқымды жиынға еліміздің түкпір-түкпірінен келген жетекші кардиохирургтармен қатар, көршілес мемлекеттердің үздік дәрігерлері мен медицина саласының беделді өкілдері қатысты. Олар жүрек хирургиясындағы жаңа технологиялық шешімдер, ғылыми жетістіктер, инновациялық тәжірибелер және халықаралық ынтымақтастықтың болашағын жан-жақты талқылады. Конгресс барысында бірқатар маңызды бастамалар көтеріліп, тараптар өзара әріптестікті тереңдету мақсатында арнайы меморандумға қол қойды. Бұл құжат алдағы уақытта ортақ жобаларды жүзеге асыруға, тәжірибе алмасуды жандандыруға және саланы жаңа деңгейге көтеруге жол ашады.

Айрықша атап өтерлігі, мерейтой қарсаңында орталықтың өз базасында ҚР Президенті жанындағы Ұлттық ғылым академиясының Перспективті кардиологиялық зерттеулер орталығы ашылды. Бұл – тек Шымкент медицинасы үшін ғана емес, жалпы еліміздің денсаулық сақтау саласы үшін үлкен жетістік. Жаңа орталық жүрек-қан тамырлары ауруларын зерттеу, инновациялық әдістерді енгізу және заманауи ғылыми жобаларды жүзеге асыруға арналмақ. Ширек ғасыр ішінде Шымкент жүрек орталығы мыңдаған науқастың өмірін аман алып қалып, аймақтық қана емес, республикалық маңызы бар медициналық мекемеге айналды. Мұнда жоғары білікті дәрігерлер әлемдік стандарттарға сай заманауи құрылғыларды пайдаланып, отандық кардиохирургияның дамуына сүбелі үлес қосып келеді. Осылайша, 25 жылдық тарихы бар орталық бүгінгі күні халықаралық деңгейде мойындалған заманауи медициналық мекеме ретінде өз мерейтойын жаңа жетістіктермен қарсы алды.