КАРАТЭШІЛЕР ЕЛ НАМЫСЫН АСҚАҚТАТТЫ

Қытайдың Шаогуань қаласында өткен жасөспірімдер арасындағы Азия чемпионатында шымкенттік спортшылар шеберлігін дәлелдеді. Байрақты бәсекеде олар ел намысын асқақтатып, 1 алтын және 3 қола медаль иеленді. Жас дарындардың жеңісі тек жанкүйерлерін ғана емес, бүкіл қала жұртшылығын қуанышқа бөледі. Жеңімпаздарды  қалада сән-салтанатпен қарсы алып, ерекше құрмет көрсетті. Қытайда өткен халықаралық чемпионатта 30 елден келген мыңға жуық каратэші бақ сынады. Аталған дүбірлі додада қазақ спортшылары жоғары деңгейде өнер көрсетіп, жалпы саны 22 медаль жеңіп алды. Осы нәтижемен ұлттық құрама командалық есепте төртінші орынға тұрақтады.

Жеңімпаз спортшының жоғары жетістігі – талмай еңбек ету мен бапкерлердің кәсіби шеберлігінің айқын нәтижесі. Олардың жеңісі Шымкент қаласының спорттағы беделін арттырып, ел намысын абыроймен қорғауға зор үлес қосты. 1 орын жеңген Балнұрдың анасы қызының жарыс жолындағы әр қадамын жүрек дүрсілімен бақылап, “тақымымызды қысып отырдық” дейді. Жас спортшы бұл жолды өзі таңдаған, ал отбасының барлық мүшесі спортқа жақын көрінеді.

Жарыс нәтижесі бойынша жасөспірімдер арасында 61 кг салмақта Құрбанәлі Балнұр І орын алды. 54 кг салмақта Ұнталап Айша ІІІ орынға ие болды. Кадеттер арасында 66 кг салмақта Темірхан Айдын ІІІ орынды жеңіп алды. Жастар арасында 61 кг салмақта Бәкірова Айжан ІІ орын, ал 68 кг салмақта Сағынбек Лаура ІІІ орынды иеленді.