Шымкентте Табиғи монополияларды реттеу комитетінің департаменті «Қуатжылуорталық-3» кәсіпорнымен бірлесіп баспасөз турын өткізді. Мақсат – инвестициялық бағдарламаның орындалу барысын таныстыру. Жобалар аясында жылу желілері жаңартылып, тұрғындарға жеткізілетін жылу сапасы арта түсетіні айтылды.
Күншығыс шағынауданында 454 м жылу желісі ауыстырылуға жоспарланған болатын. Бұл жұмыстар 2025 жылға арналған инвестициялық бағдарлама аясында жүзеге асқан. Жобаға 16 миллион 346 мың теңге қарастырылған. Оның 12 миллион 356 мың теңгесі игерілген. Ал 3 миллион 990 мың теңге мемлекеттік сатып алулар нәтижесінде үнемделіп отыр.
Инвестициялық бағдарламаны іске асыру нәтижесінде 2022–2026 жылдар аралығында жылу жүйелеріндегі ысыраптарды 0,1 пайызға қысқарту көзделген. Сондай-ақ нормативтен артық шығындар жойылып, көрсеткіш 24,5 пайыздан 24,4 пайызға төмендейді. Жылу желілеріндегі апаттардың саны 29,4 пайызға азайып, тұтынушыларға жеткізілетін жылу энергиясының сапасы жақсарады деп күтілуде.
