285 СТУДЕНТ ӘКІМНІҢ ГРАНТЫНА ИЕ БОЛДЫ

Шымкентте қала әкімі грантының иегерлері  анықталды. Жалпы 285 талапкердің жоғары білім алуына жол ашылып отыр. Әкімдіктің қолдауымен тегін білім алатындардың қатарында Ө.Жәнібеков атындағы Оңтүстік Қазақстан педагогикалық университетінің 22 студенті бар.  Білім күні қарсаңында жастарды оқу ордасы сән-салтанатпен күтіп алды. Қала әкімінің орынбасары салтанатты шараға қатысып, білім алушыларға сертификатын табыстады.

Педагогтарды даярлайтын оңтүстіктегі қара шаңырақта бүгінде  80 мыңнан астам студент тәрбиеленіп, ел болашағына қызмет етуде. Биыл  үшінші мегпаолисте 285 талапкер қала әкімінің грантын жеңіп алып, үлкен өмірдің парағын ашқады тұр. Олардың ішінде 22-сі – педагогика саласын таңдаған жастар. Салтанатты жиынға арнайы келген қала әкімінің орынбасары Сәрсен Абайұлы грант иегерлерін құттықтап, жүрекжарды лебізін білдірді. Ол өз сөзінде білім – ортақ мүдде, ал ұстаз – ұлттың тірегі екенін ерекше атап өтті.

Өзбекәлі Жәнібеков атындағы Оңтүстік Қазақстан педагогикалық университеті – сапалы білім мен тәрбие беруде көшбасшылардың бірі. Биыл Оқу ордасына-1096 “Алтын белгі” иегері мен 285 үздік аттестат иегері оқуға тапсырған. Бүгінде университетте 40 білім беру бағдарламасы бойынша бакалавр, 22 бағдарлама бойынша магистратура және 13 бағдарлама бойынша доктарантура мамандарын дайындайды.

Оқу ордасында бүгінде Мемлекеттік грантқа 572 студент ие болған.  Шара барысында жас  педагогтар қуанышымен бөлісті. Олар болашақта білікті маман атанып, ел дамуына үлес қосуды мақсат етеді. Жаңа студенттер үшін бұл күн олардың өміріндегі маңызды әрі тарихи сәтке айналды. Салтанатты жиынның соңында ұйымдастырылған концерттік бағдарлама жастарға көтеріңкі көңіл-күй сыйлады. Осылайша армандары асқақ, үміттері биік жас талапкерлер болашаққа нық қадам басты. Бұл күн олардың жарқын болашағына бастар алғашқы қадам.