22 ЖАС ӘСКЕР ҚАТАРЫН ТОЛЫҚТЫРДЫ

      Шымкенттен 22 жас сарбаз әскерге аттанды. Олар Отан алдындағы борышын Алматы облысындағы шекара шебінде өтейтін болады. Ертеңгі ел тірегі саналатын азаматтарды салтанатты түрде шығарып салу рәсімі өтті. Бұл шара 12 қыркүйек – жергілікті әскери басқару органдары күнімен тұспа-тұс өтіп, мерекелік мәнге ие болды.

      1 қыркүйектен бері шаһардан 44 жасөспірім шекара шебіне жіберілген. 54 жыл сапта қызмет еткен ардагерлер төрағасының айтуынша, олардың мүмкіндіктері зор. Қазіргі талаптарға сәйкес, 12 айлық мерзімді қызметін абыроймен аяқтаған сарбаздар әскери оқу орындарына емтихансыз түсіп, тегін білім ала алады. Осылайша, олар қалаған мамандығы бойынша офицер атануға мүмкіндігі бар.

     Шымкент қаласы қорғаныс істері жөніндегі департаменті бастығының айтуынша, мемлекет басшысы мен қала әкімінің қаулысына сәйкес күзгі әскерге шақыру науқаны басталған. Ол 31 желтоқсанға дейін жалғасады. Сонымен қатар, 18 бен 27 жас аралығындағы ер азаматтар отан қорғау парызын өтеуге шақырылады.

Әскери өмірге қадам басқан жас өреннің бірі – Дастан. Отан алдындағы борышын өтеу – ол үшін үлкен парыз. Дастан бұл қадамды ер азаматтың өміріндегі маңызды белес деп біледі. Жас сарбаз әскерде шынығып, жаңа тәжірибе жинап, тәртіп пен жауапкершілікті үйренгісі келетінін жеткізді. Оның айтуынша, әскер қатарында болу – туған жерді қорғаудың айқын белгісі. Қарасай шекара басқармасына жіберілген сарбаздар биылғы күзгі шақырудың үшінші легін құрайды. Сондай-ақ екінші қазанға дейін шекара қызметіне 200-ге жуық жас сарбазды әскерге жіберу жоспарланған. Бұл бағыттағы жұмыс кезең-кезеңімен жүзеге асуда.