Мемлекет басшысы инвестициялық ахуалды жақсарту және кәсіпкерлікті дамытуға ерекше мән беріп келеді. Осы орайда прокуратура органдары инвесторлардың құқықтарын жүйелі әрі тиімді қорғауға, сондай-ақ маңызды жобалардың іске асырылу барысын барлық кезеңде қадағалауға бағытталған жұмыстарды тұрақты жүргізуде.
Шымкент қаласы Әл-Фараби ауданының прокуроры мақта, аралас және тігін маталарын өндіретін «Шабитекс» ЖШС ұжымымен кездесу өткізді. Бұл жоба өңір экономикасы үшін маңызды болып табылады, себебі жалпы инвестиция көлемі 1,9 млрд теңгеден асады, ал кәсіпорын іске қосылғанда 120 жаңа жұмыс орны ашылады деп жоспарлануда.
Кездесу барысында инвестор кәсіпорын қызметіне кері әсер еткен проблемалық мәселені ортаға салды. Өнеркәсіп және құрылыс министрлігінің Мемлекеттік қорғаныстық тапсырыс комитеті тарапынан жеткізілген өнім үшін төленбеген 160 млн теңге берешек кәсіпорынның салықтық міндеттемелерін өтеуіне кедергі келтіріп, тұрақтылығына қауіп төндірген.
Прокуратура араласқаннан кейін аталған берешек толық өтеліп, кәсіпорынның жұмысы жоспарлы режимде жалғасуына мүмкіндік туды. Бұл өз кезегінде салықтардың уақытылы төленуін қамтамасыз етіп қана қоймай, өңірде жаңа өндіріс орындарының ашылуына, еңбек нарығының дамуына оң ықпал етпек.
Прокуратура органдарының басты міндеттерінің бірі – бизнес пен инвесторлардың заңды құқықтары мен мүдделерін қорғау екенін атап өткен жөн. Осыған байланысты кәсіпкерлерде өзекті мәселе туындаған жағдайда Шымкент қаласы прокуратурасы жанындағы Кәсіпкерлер мен инвесторлардың құқықтарын қорғау жөніндегі байланыс орталығына +77076150010 нөмірі арқылы немесе Фронт-офиске (мекенжайы: Шымкент қаласы, Ерімбетов көшесі, 304 г, «Заңғар» бизнес орталығы) жүгінуге болады.
