Шымкент қаласындағы базарларды жаңғырту жұмыстары қарқын алып келеді. Сауда және интеграция министрлігінің өкілдері күннің екінші жартысында қаладағы ірі сауда орындарының тыныс-тіршілігімен танысуды жалғастырды. Жаңа жүйе бойынша әрбір базар тек сауда орны ғана емес, тұрғындар мен кәсіпкерлер үшін қолайлы инфрақұрылымға айналуы тиіс. Сол себепті әр базардың қазіргі жағдайы мен жаңғырту қарқыны ерекше назарға алынды. Алдымен назарға алынған – «Авто Нұр» базары. Мұнда автокөлікке қажетті қосалқы бөлшектерден бастап тұрмыстық техникаларға дейін табуға болады. Қазіргі таңда сауда нүктелері жаңартылып, бейнебақылау және қауіпсіздік жүйелері орнатылған. Бұл сатып алушылардың сенімін арттырып, кәсіпкерлердің жұмысын жеңілдетуде. Келесі аялдама – қала тұрғындары үшін маңызды орындардың бірі, Жабық базар. Мұнда күнделікті азық-түлік өнімдері ұсынылады. Бүгінгі таңда ішкі желдеткіш пен жарықтандыру жүйесі ретке келтіріліп, санитарлық талаптар күшейтілген. Сауда қатарлары ыңғайлы етіп жасақталып, тұтынушыларға барынша қолайлы жағдай жасалуда.
Одан соң министрлік өкілдері «Көктем» базарына барды. Қала халқы үшін қолжетімді бағадағы киім-кешек пен тұрмыстық тауарларды ұсынатын бұл орын да жаңа кейіпке енуде. Жаңа павильондар бой көтеріп, автотұрақтар кеңейтілді. Тіпті балаларға арналған қауіпсіз аймақ қарастырылған. Жалпы, Шымкент қаласы бойынша жыл соңына дейін төрт базар толық жаңартылып үлгеруі тиіс. Бұл тұрғындарға сапалы қызмет ұсынумен қатар, кәсіпкерлер үшін де жаңа мүмкіндік ашпақ. Жаңғыртудан өткен әр базар – жай ғана сауда орны емес, ол – тұрғындардың күнделікті тұрмысын жеңілдететін, кәсіпкерлікті қолдайтын заманауи орталық. Алдағы уақытта Шымкенттің сауда алаңдары жаңа стандарттарға сәйкес келіп, қала мәдениетінің бір бөлігіне айналмақ.
