ОҚУШЫЛАР 100% ОҚУЛЫҚПЕН ҚАМТЫЛАДЫ

Шымкенттік оқушылыр жаңа оқу жылында 100% оқулықпен қамтылады. Бұл туралы  қалалық мәслихаттың 28-сессиясында салалық басқарма басшысы айтты. Сондай-ақ, жиында қаладағы жылу жүйелерінің  қысқа дайындық мәселелері қаралды. Жалпы күн тәртібіне 11 мәселе енгізіліп, тиісті басқарма басшылары мен аудан әкімдері есеп берді.

Сессияның алғашқы бөлігінде Абай, Әл-Фараби, Еңбекші, Қаратау және Тұран аудандарының әкімдері жыл бойы атқарылған жұмыстарын баяндады. Абай ауданында аулаларды жарықтандыру, көшелерді жөндеу және әлеуметтік нысандарды жаңғырту жұмыстары жүргізілген. Сонымен қатар, халықтың әл-ауқатын арттыру бағытында бірнеше әлеуметтік жоба іске асырылғаны айтылды. Қалалық білім басқармасы жаңа оқу жылына дайындық барысы жайлы есеп берді. 2025–2026 оқу жылында оқушылар 100% оқулықпен қамтамасыз етіледі. Бұл білім сапасын арттыруға бағытталған маңызды қадам ретінде бағаланды. Мәслихат Депутаты  оқу жылына дайындық күн тәртібінен түспей тұрған мәселе екенін атап өтті.

Энергетика басқармасы жылыту маусымына дайындық деңгейі 68% екенін хабарлады. Әл-Фараби ауданындағы кейбір жылу жүйелері қосымша жөндеуді талап етеді. Дегенмен, басқарма өкілдері дайындық жоспарға сай жүріп жатқанын айтты. Сессия қорытындысында мәслихаттың келесі отырысы желтоқсанда өтетіні және қыркүйекте кезектен тыс жиын болуы мүмкін екені мәлімделді.