БІЛІМ ЖОЛЫНДАҒЫ БЕРЕКЕЛІ БАСТАМА

«Мектепке жол» республикалық акциясы – қоғамдағы бірлік пен жанашырлықты білдіретін дәстүрлі қайырымдылық шарасы. Биыл бұл акцияға Ақмешіт мешітінің жамағаты белсене қатысып, 500-ге жуық оқушыны мектепке қажетті заттармен қамтыды. Сөмке мен кеңсе тауарлары толығымен табысталды. Бұл – көпбалалы және әлеуметтік жағдайы төмен отбасыларға үлкен қолдау.

Ақмешіт жамағаты үшін бұл үрдіс бір реттік шара емес. Жыл сайын тамыз айы келгенде, жаңа оқу жылы қарсаңында мешіт жамағаты бұл бастаманы дәстүрге айналдырып, өздерінің рухани әрі азаматтық борышын өтеуді мақсат етеді. Өйткені, білім – ел болашағының темірқазығы. Ал сол білімге ұмтылған әр баланың жолында тұрмыстық қиындық кедергі болмауы тиіс. Мектепке баруға дайындық кезіндегі материалдық қажеттіліктер – қазіргі таңда көптеген отбасылар үшін үлкен салмақ. Әсіресе, бірнеше баланы қатарынан мектепке дайындау көпбалалы ата-аналарға оңай емес. Осы ретте осындай қайырымдылық шаралар – олардың көңіліне демеу, жүгіне жеңілдік. Ең бастысы – бүлдіршіндердің мектепке қуана, шабытпен баруына себеп болады.

«Жақсылық – жария болмағанмен, жұртқа үлгі болуы тиіс» дегендей, мұндай ізгі істер қоғамда өзара жанашырлық пен қамқорлықтың артуына септігін тигізеді. Бүгінгі берілген бір сөмке мен оқу құралдары – ертеңгі ел болашағына жасалған инвестиция. Бұл – балалардың болашаққа сеніммен қадам басуына, өздерін қоғамның бір мүшесі ретінде сезінуіне үлкен ықпал етеді. Алдағы уақытта да бұл бастама өз жалғасын тауып, көмекті қажет ететін әр баланың жүзінде шаттық нұрын оятатынына сенім мол.