“АНА ЖҮРЕГІ” — САРБАЗ ҚАМҚОРШЫСЫ

           Еліміздің барлық өңірінде тіркелген «Аналар жүрегі» ұйымы белсенді жұмыс істеп келеді. Басты мақсат — сарбаздарға қолдау көрсетіп, олардың қызмет ету жағдайын тексеріп, әлеуметтік кепілдіктерін қамтамасыз ету. Ана мен бала арасына дәнекер болуды мақсат тұтқан аталмыш ұйым гарнизонның үздік сарбаздарын ұлықтауға арналған жиын өткізді.

    «Ана жүрегі» комитеті – сарбаздарға анасындай қамқорлық көрсетуді мақсат тұтқан ұйым. Комитет 2019 жылдан бері Қорғаныс министрлігі, еліміздегі әскери бөлімдермен тығыз қарым-қатынас жасап, сарбаздардың әскер­дегі жағдайына қатысты өзекті мәселе­лерді көтеріп келеді. Мақсат – сол мәселелердің оң шешілуіне атсалысу дейді, ұйымдастырушылар.

      Жалпы, аналар комитеті әр сарбаздың тағдырына өз баласындай алаңдайды. Өйткені әрбір ана балаларының әскери борышын қалай, қандай жағдай­да орындайтынына баса мән береді. Сондықтан аталмыш ұйым әскери бөлімдермен тығыз жұмыс жасап, сарбаздардың әскери өмірін, жағдайларын әлеуметтік желілер арқы­лы көрсетіп отырады екен.

     Сахна төрінде аналарды тағы бір жағымды тосынсый күтіп тұрды – түрлі әскери бөлімшелерде қызмет етіп жүрген ұлдарымен кездесу сәті ұйымдастырылды. Көптеген аналар қуаныштан көз жасын тыя алмады. 35748 әскери бөлімінде борышын өтеп жатқан сарбаздардың бірі Бақдәулет Есіркеп. Ол әрбір ер азаматты еліне қызмет етіп, берілген антына адал болуға шақырады.  Осылайша Ел алдындағы міндетін мінсіз атқарып,алдына қойылған міндеттерді бұлжытпай орындаған Сарбаздарға алғыс хаттар тапсырылып, 10 күндік демалыс берілді.