Шымкентке жұмыс сапарымен келген Мәдениет және ақпарат министрі Аида Балаева төрт жыл бұрын салынған «Шымқала» тарихи-мәдени кешенінің қазіргі жағдайына назар аударды. 2 миллиард 700 миллион теңге бюджет қаржысына бой көтерген нысанның қасбеттері қирап, қабырғалары мүжілген. Ең қиыны – кешеннің заңды құжаттары әлі күнге дейін рәсімделмеген. Мәдениет және ақпарат министрі Аида Балаева Шымкент қаласына жұмыс сапарымен келді. Бұл – министрдің мегаполиске және Түркістан облысына алғаш келуі емес. Бұған дейін де ол өңір халқымен жүздесіп, мәдени жобаларды талқылаған болатын. Сапардың негізгі мақсаты – азаматтарды қабылдап, олардың мұң-мұқтажын тыңдау. Мемлекеттік қызметкер ретінде министр әр тұрғынның сөзін естіп, мәселенің шешімін табуға күш салды. Кездесу барысында назар аударылған тақырыптардың бірі – төрт жыл бұрын бой көтерген «Шымқала» тарихи-мәдени кешені. Бюджеттен 3 миллиардқа жуық қаржы қаралғанымен, бүгінде кешеннің жағдайы мәз емес. Тағы бір маңызды жайт – бұл нысанның заңды құжаттары әлі күнге дейін рәсімделмеген. Яғни, қала билігі бірнеше миллиард теңгеге жуық қаржыға кешен тұрғызып, оны ресми тіркеуге алмапты. Бұл мәселеге байланысты министр Шымкент қаласының әкімдігін бірлесе әрекет етуге шақырды.
Жиында сондай-ақ, Президент Қасым-Жомарт Тоқаевтың тапсырмасына сәйкес, Шымкентте Мәдениет және өнер университетін ашу мәселесі де сөз болды. Аида Балаеваның айтуынша, бұл бастаманы жүзеге асыру үшін ең алдымен білімді, тәжірибелі ұстаздар құрамын жасақтау қажет. Сондай-ақ, нысанға сапалы жөндеу жұмыстары жасалуы керек. Министр бұл бағытта жүйелі жұмыс жүріп жатқанын және оқу орны ашылған жағдайда өңірдің шығармашылық әлеуетін арттыруға зор үлес қосатынын атап өтті. Бұл кездесу – жай ғана жұмыс сапары емес, аймақтың мәдени болашағын айқындайтын маңызды диалог алаңы болды. Министр көтерген әрбір мәселе – халықтың көз алдындағы шынайы проблемалар. Оларды шешу үшін мемлекет пен қоғамның бірлескен қадамы қажет. Өйткені мәдениет – ұлттың айнасы, ал оны сақтау мен дамыту – баршамыздың ортақ борышымыз. Шымкент – жасампаздық пен жаңашылдыққа толы қала. Мұнда мәдениет пен өнердің өрісін кеңейту – тек өңірдің ғана емес, бүкіл елдің рухани дамуына қосылатын үлес. Сондықтан айтылған мәселелер шешімін тауып, халықтың сенімін ақтауы тиіс.
