ҮШЕМДЕР 56 КҮННЕН КЕЙІН ҮЙІНЕ ШЫҚТЫ

Шымкентте жыл басынан бері үшінші үшем дүниеге келді. Ерте туған сәбилер 56 күн бойы медицина мамандарының бақылауында болған. Қазіргі таңда балалардың да, ананың да жағдайы жақсы. Дәрігерлер сәбилерге ерекше күтім көрсетіп, үйлеріне шығаруға рұқсат берген.

Сәбилер бірнеше минут айырмашылықпен туған. Нәрестелердің туған кездегі салмағы 975, 1765 және 1920 грамм болған. Ерте босанудың салдарынан нәрестелерге арнайы медициналық көмек қажет болды. Осы себепті олар 56 күн бойы дәрігерлердің жіті бақылауында болып, арнайы күтім мен ем қабылдады. Бұл кезеңде ананың да денсаулығы мұқият қадағаланған.

Қазіргі уақытта ана мен үшемдердің жағдайы бірқалыпты жақсы. Нәрестелердің салмағы да айтарлықтай артқан. Бұл — медицина қызметкерлерінің кәсіби біліктілігі мен тынымсыз еңбегінің нәтижесі. Үшемдерді өмірге әкелген Фатиманың бұл — екінші босануы. Осылайша, Фатима мен жұбайы Зухрейдин төрт баланың ата-анасы атанды. Сәбилерге есімді олардың ата-әжесі қойған: қыз бала — Мерием, ұлдары — Расул мен Гамзат.

Айта кетейік, 2025 жылдың басынан бері Шымкент қаласында 15 793 сәби дүниеге келген. Оның ішінде 7726 — қыз, 8067 — ұл бала. Сондай-ақ 180 егіз туу жағдайы тіркелген. Заманауи медициналық жабдықтар мен білікті мамандардың арқасында аналар мен сәбилерге сапалы медициналық көмек көрсетіліп, олардың аман-есен өмірге келуіне барлық жағдай жасалып отыр.