Абай Құнанбайұлының 180 жылдық мерейтойы аясында ел көлемінде түрлі танымдық-мәдени жобалар жүзеге асырылуда. Соның бірі – “Бұлақ көрсең – көзің аш” атты жоба. Аталған бастама аясында Жансая Әбдімәлік шахмат мектебінде шахматтан жолдастық кездесу ұйымдастырылды. Зияткерлік сайысқа 5 жастан 25 жасқа дейінгі 30-ға жуық жас қатысты. Жарыстың ерекшелігі – қатысушылардың деңгейі мен тәжірибесіне қарай екі топқа бөлініп сайысқа түсуі. Бірінші топта кәсіби шахматшылар бақ сынаса, екінші топта бұл спортқа енді бет бұрып келе жатқан жас буын өнер көрсетті.
Жарыс швейцариялық жүйе бойынша өтті. Бұл – әр ойыншы бірнеше қарсыласпен ойнап, әр партияда ұпай жинай отырып жеңімпаз анықталатын әдіс. Мұндай жүйе балалардың тек қарсыласпен бәсекеге түсіп қана қоймай, өз мүмкіндігін толық көрсетуіне жол ашады. Шараның басты мақсаты – балалар мен жастарды шахмат арқылы ой еңбегіне, терең ойлауға, жүйелі шешім қабылдауға үйрету. Сонымен қатар, Абай мұрасын насихаттау, оның “білім мен ғылым – адамдықтың негізі” деген өсиетін бүгінгі жас ұрпақтың санасына сіңіру көзделген.
Жолдастық кездесу еркін, достық ахуалда өтті. Қатысушылар арасында бұған дейін түрлі турнирлерге қатысып, жеңіс тұғырынан көрінгендер де, алғаш рет шахмат додасына қадам басқандар да болды. Ұйымдастырушылардың айтуынша, мұндай шаралар балалардың зияткерлік дамуына ғана емес, өзіне деген сенімін арттыруға да септігін тигізеді. Жоба аясында мұндай форматтағы зияткерлік кездесулер алдағы уақытта өзге де аймақтарда жалғасын табады. Ұйымдастырушылардың айтуынша, Абайдың рухани мұрасын ұлықтау мен жастарды ғылым-білімге ынталандыру – бұл жобаның негізгі өзегі болып қала бермек.
