ЕРІКТІЛЕР МЕКТЕБІ АШЫЛДЫ

Волонтерлік – жастар үшін өмір салтына айналып келеді. Бүгінде мегаполисте ЮНИСЕФ волонтерлер мектебі салтанатты түрде ашылды. Ауқымды жастар іс-шарасы қала әкімдігі мен М. Әуезов атындағы Оңтүстік Қазақстан университетінің қолдауымен ұйымдастырылған. Шараға студенттер, оқушылар, белсенді жастар мен жас көшбасшылардан құралған 180-ге жуық қатысушы қатысты.

Ұйымластырылған шарада жастар бала құқықтары, қоғамдағы оң өзгерістерге қосар үлесі және ЮНИСЕФ-тің жаңа волонтерлік бағдарламасы туралы мағлұмат алды. Бұл жиын – Ақтау мен Астанада басталған «Балалар мен жастардың құқықтары мен әл-ауқаты үшін» атты ұлттық кездесулерінің жалғасы.

     Еріктілер мектебі жастарды бала құқықтарын ілгерілету ісіне кеңінен тартуға ниетті. Ұйым өкілі қатысушыларға арнаған сөзінде жастардың қоғамдағы рөлін ерекше атап өтті. Оның айтуынша, жастар – жай қатысушы емес, үлкен өзгерістердің қозғаушы күші. Сонымен қатар, қала жастары ЮНИСЕФ-тің 70-тен астам елде жүзеге асып жатқан Грин Райзинг климаттық қозғалысына қосылуға мүмкіндік алды. Бұл – жастардың экологияны қорғауға бағытталған жаһандық бастамасы.

Аталмыш қордың еріктілер қозғалысы бүгінде әлем бойынша 10 миллионнан астам жасөпірімді біріктіріп, осы бастаманың бір бөлігіне айналды. Жастар бұл алаңда тек тың идеялар ұсынып қана қоймай, балалар үшін өзекті мәселелерді бірге талқылады. Экология, психологиялық саулық, тең мүмкіндік пен сапалы білім – бәрі де олардың назарында. Енді олар осы бағыттарда нақты бастамалар әзірлеп, қоғамға пайдасын тигізуге дайын.