Отбасы – адамзат үшін ең қастерлі құндылықтың бірі. Оның іргесі берік, шаңырағы биік болса ғана елдің демографиялық ахуалы жақсарып, қоғам дамуының берік негізі қаланады. Алайда, өкінішке қарай, әлеуметтік және тұрмыстық қиындықтарға байланысты кейбір отбасыларда татулықтың шырқын бұзатын жайттар орын алуда. Соның салдарынан бейкүнә сәбилердің тағдырына көлеңке түсіп, олар ерте жасынан қиындық көріп өсуде.
Бұл мәселе ешқашан қоғам назарынан тыс қалмауы тиіс. Себебі отбасындағы тұрақсыздық – тұтас ұлттың болашағына тікелей әсер етеді. Сондықтан тұрмыстық зорлық-зомбылықтың алдын алу – тек құқық қорғау органдарының емес, бүкіл қоғамның ортақ міндеті.
Шымкентте тұрмыстық зорлық-зомбылықтың алдын алу бағытында кешенді шаралар қолға алынуда. Қалалық Полиция департаменті бұл мәселе бойынша түскен әрбір шағым жіті бақылауға алынатынын мәлімдеді. Әйелдер мен балаларды қорғау, отбасындағы жанжалдарды азайту шаралары туралы өңірлік коммуникациялар қызметінде өткен брифинг барысында кеңінен айтылды.
Мамандардың айтуынша, жаңа бөлім ашылғаннан бері жұмыс қарқыны артқан. Қазір тәуекел тобына жататын отбасылармен жеке профилактикалық жұмыс жүргізілуде. Сонымен қатар, зардап шеккендерге құқықтық, психологиялық және әлеуметтік көмек көрсету жолға қойылған.
Полиция лейтенанты Диана Сахибекованың айтуынша, тұрмыстық жанжал туралы хабарлардың бірқатары балалардан түсіп жатады. Олар анасына әкесінің қол көтеріп жатқанын айтып, көмек сұрайды. Әрбір дабыл назарға алынып, мекенжай анықталған соң тиісті инспекторға жолданады. Стандартты алгоритм бойынша отбасының әлеуметтік жағдайы зерттеледі, баллдық шкаламен есеп жүргізіледі.
– Жанжалдың негізгі себептері – жұмыссыздық пен материалдық жетіспеушілік. Ер адамдардың бос уақытын ішімдікке жұмсауы да жиі кездеседі. Сонымен қатар ене мен келін, қайыната мен келін, әке мен бала арасындағы жанжалдар да бар, – дейді Диана Сахибекова.
Шаһарда бүгінде зорлық-зомбылықпен айналысатын арнайы 20 қызметкер бес ауданға бөлінген. Департаментте тағы 11 маман жұмыс атқарады. Жергілікті полиция қызметі бастығының орынбасары Ердәуіт Ниязовтың айтуынша, негізгі проблемалар – маскүнемдікке салынған күйеулердің жұбайлары мен балаларына күш қолдануы.
– Мұндай жағдайда біз тиісті ведомстволармен бірлесіп жұмыс істейміз. Атап айтқанда, білім, спорт және денсаулық басқармалары, отбасылық қолдау орталығы, прокуратура өкілдерімен бірге ай сайын дөңгелек үстел өткіземіз. Онда әрбір оқиға жеке қаралып, шешу жолдары талқыланады, – дейді спикер.
Қазіргі таңда қалада үш дағдарыс орталығы жұмыс істейді. Онда зардап шеккен әйелдер бала-шағасымен бірге алты айға дейін тегін тұра алады. Мұндай көмекті қажет ететін отбасылар қатары көп.
Тұрмыстық зорлық-зомбылықпен күресу – тек полицияның емес, бүкіл қоғамның ортақ міндеті. Бұл бағыттағы жүйелі жұмыс жалғасады, бірақ мәселенің түбегейлі шешілуі отбасылық қарым-қатынасты нығайту мен әлеуметтік тұрақтылыққа тікелей байланысты.
