ҮЗДІК ЖАСТАРҒА МИЛЛИОН ТЕҢГЕ

«Jas Keñes Sıylığı» — жас мамандардың еңбегі мен бастамашылдығын бағалайтын тәуелсіз жастар сыйлығы. Бұл марапат Қазақстан Президенті жанындағы Жастар саясаты жөніндегі кеңестің бастамасымен 2024 жылы тағайындалған. 2025 жылғы сыйлық туралы «Haileybury Astana» мектебінің қазақ тілі пәні мұғалімі, Кеңес мүшесі Озода Баходирқызы баспасөз жиынында мәлімдеді. Сыйлық экономика мен қоғамдық өмірдің түрлі саласында көзге түскен жастарға табысталады.

2025 жылы байқаудың ауқымы едәуір кеңейді. Өткен жылмен салыстырғанда номинациялар саны 7-ден 10-ға дейін артты, сондай-ақ жаңа бағыттар енгізілді. Енді бұл марапатқа жас ғалымдар мен оқытушылар, медицина қызметкерлері, цифрлық технологиялар, атом энергетикасы және креативті индустрия өкілдері де үміткер бола алады.

Сыйлық 10 номинация бойынша табысталады. Байқауға Қазақстан Республикасының 35 жасқа толмаған азаматтары қатыса алады. Қатысу үшін үміткерлер 2025 жылғы 20 шілдеге дейін арнайы онлайн-платформа арқылы өтінім тапсыруы тиіс. Сайысқа шалғай аудандардан үміткерлер қатыса алама деген сұрақта туындап, жауап алынды. Конкурстық іріктеу үш кезеңнен тұрады. Әр кезеңде қатысушылардың білімі, шеберлігі мен шығармашылық қабілеті жан-жақты бағаланады. Қорытынды кезең нәтижесінде әр номинация бойынша 2 жеңімпаздан анықталып, жалпы саны 20 жеңімпаз марапатталады. Жеңімпаздардың әрқайсысы 1 000 000 теңге көлемінде қаржылай сыйлыққа ие болады. Сыйлықтың бас серіктесі әрі демеушісі — «Brave Talents» компаниясы.