SAMGAU РЕСПУБЛИКАЛЫҚ ФЕСТИВАЛІ ҚОРТЫНДЫЛАНДЫ

Шымкент қаласында еліміздің жас киногерлері мен кино саласының майталмандарын бір алаңға тоғыстырған — “Samgau” республикалық қысқаметражды фильмдер фестивалі өз мәресіне жетті. Бұл отандық кинематографияның дамуына серпін беретін, жаңа есімдерді таныстырып, шығармашыл жастарға жол ашатын маңызды шара.

Қаламызда өткен фестивальдің салтанатты ашылу рәсіміне еліміздің кино өнеріндегі актерлер мен режиссерлер қатысты. Биылғы шараға еліміздің түкпір-түкпірінен 30-дан астам қысқаметражды фильм ұсынылып, олардың ішінен 20 үздік туынды ақтық кезеңге өтті.

Фестивальдің басты мақсаты — ұлттық киноөнердің дамуына үлес қосу, жас авторларды қолдау және олардың шығармашылық ізденістеріне жол ашу. Қатысушыларға арнайы тақырыптар ұсынылып, олар «Шымкент – сүйікті қалам!», «Мен және өлім», «Ұлттық құндылық – тәрбие негізі», «Жұмысшы мамандықтардың рөлі», «Экология», «Тіліміздің тағдыры – біздің қолымызда» тақырыптарында туындыларын жарысқа қосты. Үздіктер осы бағыттар бойынша анықталды.

Қазылар алқасы құрамында 5 беделді сарапшы әділ қазылық етіп, әрбір туындыға кәсіби тұрғыдан баға берді. Фестивальде қатысушыларға жүлде табыстау рәсімі өтті. Бірқатар номинациялар бойынша жеңімпаздар марапатталып, олардың шығармашылық еңбектері жоғары бағаланды.

Сонымен қатар, барлық қатысушыларға ынталандыру сыйлықтары табысталып, оларға шабыт пен қолдау көрсетілді. “Samgau” фестивалі — тек шығармашылық жарыс қана емес, жас киногерлер үшін тәжірибе алмасатын, кәсіби байланыстар орнататын маңызды алаң. Бұл шара — көрермен үшін жаңа есімдермен танысу мүмкіндігі болса, жас авторлар үшін үлкен өнер жолына бастар маңызды қадам.