БОЛАШАҚ ӘСКЕРИЛЕР ХАЛЫҚАРАЛЫҚ ДОДАДА ТОП ЖАРДЫ

«Ардагер өсиеті» атты республикалық жастар марафоны — ұрпақтар сабақтастығын нығайтып, тарихи жадымызды жаңғыртуды көздеген маңызды жоба. Кең ауқымды бұл бастама еліміздің барлық өңірін қамтып, жоғары деңгейде ұйымдастырылды. Биылғы марафонға тек Қазақстаннан ғана емес, алыс-жақын шет елдерден де жастар қатысып, өзара тәжірибе алмасты. Барлығы 12 мемлекеттен келген өрендер байқауда бақтарын сынап, рухани байланыс орнатты. Ақтөбе қаласындағы Кеңес Одағының Батыры Әлия Молдағұлова мемориалдық кешенінде өткен марафонның салтанатты ашылу рәсімі — халықаралық деңгейдегі маңызды шара болды. Жастар мен ардагерлердің тағылымды кездесуімен басталған бұл іс-шара ел мен елді, ұрпақ пен ұрпақты жалғайтын рухани алтын көпірге айналды.

Марафон аясында ұйымдастырылған әскери-патриоттық байқаулар мен зияткерлік жарыстарда Шымкент қаласының жастары ерекше белсенділік танытып, жүлделі орындарға ие болды. Әсіресе, «Жас сарбаз» әскери-патриоттық клубының Шымкент қалалық құрамасы қола медальға ие болса, Сабыр Рахымов атындағы республикалық әскери колледждің тәрбиеленушілері бас жүлдені жеңіп алды. Жеңімпаздар қатарында болған 30 шымкенттік жас елге оралып, оларды жерлестері зор ықыласпен қарсы алды. Қалалық білім басқармасы, ардагерлер кеңесі, ұстаздар мен ата-аналар жеңімпаздарды салтанатты түрде күтіп алды. Марафон барысында жастар соғыс ардагерлерінің жүрек тебірентер хаттары мен тағылымды өсиеттерін жинап, оларды «Батырларға тағзым» онлайн порталына жүктеді. Бұл тарихи мұралар көпшілікке қолжетімді етіліп, кейін Астанадағы арнайы музей қорына табысталатын болады.