Қайнарбұлақта “Amanat” партиясының қоғамдық қабылдауы өтті. Құқықтық көмек жобасы аясында ұйымдастырылған кездесуде тұрғындар көкейде жүрген бірқатар өзекті мәселелерін көтерді. Атап айтқанда, қоғамдық көлік жетіспеушілігі, тұрмыстық қалдықтардың дер кезінде шығарылмауы және инфрақұрылымның жеткіліксіздігіне тұрғындар шағымданды. Қайнарбұлақтың Бөлешов көшесінің тұрғыны қоғамдық қабылдауда өз мәселесін ашық жеткізді. Үш бірдей шешілмеген мәселесін арқалап келген ол, бұған дейін айтылып келсе де, нәтиже болмай жатқан жайларды тілге тиек етті.
Тағы бір тұрғын Қайнарбұлақтағы қоғамдық көлік мәселесінің әлі күнге дейін шешімін таппағанын алға тартты. Оның айтуынша, таңертең және кешкі уақытта автобус тапшылығы тұрғындарды әбігерге салады. Осы уақытқа дейін “шешеміз” деген жауапты сөздерден шаршаған тұрғындар енді нақты нәтижені күтеді. Бұл сұрақтарға Amanat партиясының орталық аппаратының инспекторы жауап берді.
