«МЕНІҢ СҮЙІКТІ АҒАТАЙЫМ» ДРАМАСЫ САХНАЛАНДЫ

Қаламызда Жұмат Шанин театрының 95 жылдығына арналған фестиваль өз жалғасын табуда. Орталық Азия елдері театрларының 9-шы рет өтіп жатқан бұл фестиваліне Қырғызстан, Өзбекстан, Туркия, Қарақалпақстан, Татарыстан, Әзірбайжан сондай-ақ, Қазақстан елінің өнерпаздары шаһарымызда спектакльдерін ұсынды. Елімізде 2 жылда 1 рет өтетін рухани шараға театр әлеміне қызығушылық танытқан жастар, студенттер көптеп жиналды. Мәдениет пен өнер – ел өміріндегі маңызды сала. Өнер– ұлттың жаны, ал мәдениет – рухани келбеті. 95 жылдық тарихында түрлі кезеңдерді бастан өткерген театр, бүгінде мәдениет саласының маңызды рухани ордасына айналғаны анық. Осы шара аясында фестивальдің ҚОНАҒЫ Мұхтар Әуезов атындағы Қазақ ұлттық драма театры көрермен назарына АНТОН ЧЕХОВТЫҢ «СҮЙІКТІ МЕНІҢ АҒАТАЙЫМ» драмасын ұсынды.

«СҮЙІКТІ МЕНІҢ АҒАТАЙЫМ» драмасын 37 жыл өткен соң Асхат Маемиров бұл туындыны театр сахнасына жаңаша сипатта алып келді. Кеш соңында қазылар алқасы спектакльдің маңыздылығына тоқталды. Қойылым кейіпкерлері, негізінен қарапайым адамдардың жан дүниесі өзара қақтығыстар немесе әлдебір тартыстарда емес, күнделікті өмір, тұрмыс-тіршіліктері аясында біртіндеп ашылады. Табиғи түрде дамитын оқиғалар кейіпкерлерінің  ішкі әлемін ашуға қызмет етеді де, мұның өзі көрермендерді олардың тыныс-тіршілігіне ортақтастыра отырып, өмірдің мәні мен мақсаты, махаббат, сенім, адами құндылықтар туралы сан алуан ойға қалдырады.

Сондай-ақ, бірнеше елдің театр ұжымдары спектакльді тамашалауға келген. Бұған дейін Шанин театрында көптеген ұлы тұлғалар өнер көрсеткен. Театр осы кезге дейін талай танымал тұлғаларды түлетті. Ж.Шанин театры әрқашан өз көрерменін жоғары сапалы қойылымдармен қуантып келеді. Классикалық және заманауи қазақ драматургиясының жауһарларын сахналап, ұлттық құндылықтарды дәріптеуде. Фестивальдің қорытындысында Үздік өнерпаздар мен шығармашылық ұжымдар анықталады. Үздік туындыларды Қазақстанның Еңбек Ері Асанәлі Әшімов бастаған қазылар алқасы анықтап марапаттайды.