ҰЛТЫМЫЗДЫҢ ШАМШЫРАҒЫ

Ұлттық құндылықтарға негізделген мектептің мәдени ортасын құру мақсатында №135 жалпы орта білім беретін мектебінде тәжірибе алмасу семинары ұйымдастырылды. Сонымен қоса, Қазақстан Республикасының Халық жазушысы Мұхтар Шахановқа арналған арнайы кабинет ашылды.
Ұлттық құндылықтарымыз – ұлтымыздың мәңгілік қорғаушы шамшырағы. Ұлттың қорғаны – бұл біздің ұлттық болмысымызды көрсететін тіліміз, дәстүріміз және рухани мұрамыз. Осы мақсатты алға қоя отырып, №135 мектепте «Ұлттық құндылықтарға негізделген мектептің мәдени ортасын құру: ізденіс және тәжірибе» атты қалалық мектеп директорларының тәжірибе алмасу семинары өтті. Білім ошағының құрылғанына биыл 4 жыл болған. Бүгінде мұнда 2600 оқушыға, 250 ұстаз білім береді.

Ұлттық құндылықтар – әрбір ұлттың болмысында ғасырлар бойы атадан балаға мирас болып келе жатқан адамгершілік қағидаттары. Сол жолда келер ұрпақ үшін де ата-ананың орны айрықша. Мұндай семинарлар мен жиындарға жиі қатысамыз деген ата-аналар, салт-дәстүрді бала бойына сіңіру басты міндетіміз дейді.
Біз үшін еліміздің өркендеуі, ұлттық ерекшелігіміз бен ұлттық құндылықтарымызды сақтау – қымбат қазына дейді қалалық мектеп ұстаздары. Сондай-ақ, қонақтар мектепте өткізілген семинарлар, мұндағы ұстаздар мен білім алушылардың ұлттық киім кию үлгілеріне ерекше тоқталды.

Айта кетейік, руханиятқа толы болған күнде еліміздің халық жазушысы, драматург Мұхтар Шахановқа арнап білім ошағында арнайы музей мен ақынға кабинет ашылды. Мұхтар Шаханов 1942 жылы Отырар ауданында дүниеге келген. Елімізге еңбек етіп, ақындық жолында халыққа қызмет еткен жазушы бүгінде 82 жаста. Ақын шығармаларын әртүрлі тақырыпта жазады. Ғашықтық ғаламатында біреуді бақытқа бөлеп, біреуді мұңға батырған махаббаттың құдіреттілігін баяндайды.
Серт пен сөзге ұмытшақтау өлкеде
Ғашық болып өлу — қандай мәртебе! — деу арқылы адам баласының өмірдегі мақсатын баян еткендей болады.
Сонымен қоса, мектепте Мұхтар Шаханов еңбектеріне арнап арнайы іс-шара өткізілді. Білім ошағының оқушылары ақынның өлеңдерінен үзінділер оқып, мерекелік көңіл-күй сыйлады.