Шымкент қаласы шахмат әлемінің жұлдыздары мен шахмат сүйер қауым өкілдері бас қосқан жерге айналды. Себебі мегаполисте бірнеше шахмат турнирі қатар өтуде. Оның ішінде күні кеше Қазақстан балалар кубогының 6-шы әрі финалдық кезеңі және тұңғыш рет қаланың Ашық кубогы ойнатылды. Турнирге 300-ге жуық жас шахматшылар қатысып, бақтарын сынады. Ал, жарыстың жалпы жүлде қоры 3 миллион теңгені құрайды.
Шаһарымыз шахмат астанасына айналды. Мегаполисте шахмат федерациясының ұйымдастыруымен Қазақстан Балалар Кубогының 6-шы әрі финалдық кезеңі және қаланың 1-ші Ашық Кубогы қатар өтті. Қос кубоктың ашылу салтанатына KazChess федерациясының басшылығы, шахмат сүйер қауым, 10 жасқа дейінгі 163 жас шахматшы және 14 жасқа дейінгі 128 жас өрендер қатысты. Әр жарыстың 9 туры “Көрме” орталығында 1 қарашаға дейін күн сайын өтеді. Бұдан бөлек, бұл шарада мемлекеттік қызметшілер арасында блиц-турнир де ұйымдастырылды.
Бұған дейін кубоктың бес кезеңі Тараз, Қызылорда, Қостанай, Атырау мен Павлодарда өтті. Балалар турнирі жүздеген қазақстандық шахматшыны дайындаған дарынды тәлімгер және педагог Вячеслав Владимирович Печерскийдің құрметіне арналған.
Айта кетейік, қаламызда 29 қазанда ФИДЕ әйелдер Гран-приінің 2-ші кезеңі өтеді.