25 қазан — Республика күні! Бұл күн — елдік пен бостандықты, мемлекет бірлігі мен патриотизмді дәріптейтін ұлы мереке. Атаулы күні «Шымкент сити» шағынауданында қаладағы ең үлкен ту көкке көтерілді. Оны шаһардың әр нүктесінен көруге болады.
1990 жылы 25 қазанда Қазақ КСР Жоғарғы Кеңесі Тәуелсіз Қазақстанның құқықтық құжаты Республиканың егемендігі туралы декларацияны қабылдады. Содан бері бұл күн тарих тарауларында. Атаулы күнді мегаполис тұрғындары ерекше атап өтті. «Шымкентсити» ш/а ұйымдастырылған мерекелік іс-шараға қала әкімі Ғ.Сыздықбеков, «AMANAT» партиясы Шымкент қалалық филиалының төрағасы Б.Нарымбетов, мәслихат депутаттары, қоғам қайраткерлері және еліміздің болашағын қалыптастыратын белсенді жастар қатысты.
Республика күні қаладағы ең үлкен ту көкке көтерілді. Жиында мемлекеттік Әнұран орындалып, барлық қатысушылар көк туға қарап сап түзеді.
Бүгінгі күн халық жадында мәңгі сақталмақ. Себебі, бұл сәт еліміздің бірлігі мен тәуелсіздігін дәріптейді. Салтанатты шараға жиналған тұрғындардың айтуынша көкке көтерілген ту мақтаныш сезімін тудырып, елге деген сүйіспеншілікті арттыратындай әсер қалдыратынын айтады.
Айта кетейік, Тәуелсіздіктің символына жататын мемлекеттік туды қаланың әрбір нүктесінен көруге болады. Оның биіктігі 100 метрді құраса, ұзындығы 30, ал ені 15 метр.
