Қазақтың дастарханы — бірліктің дәнекері. Берекелі дастарханның айналасына жиналған шаһардағы этнос өкілдері мерекелі жиын өткізді. Биыл тоғызыншы рет ұйымдастырылып жатқан фестивальде қазанға ет салынып, достық шаңырағында бас қосқан 17 этностың өкілі бір-біріне құрмет көрсетті.
Ұлттың ұмыт бола бастаған тағамдарын дайындаудан өзара сайысқа түскен этнос өкілдері биыл үй жағдайында әзірлеген қазақ тағамдарынан ортақ дастархан жайып, қалың көпшіліктің назарына ұсынды. Ортақ қазанда ет асып, әр үстел басындағы қонақтарға түрлі ұлттық тағамдар мен табақ тарту арқылы қазақтың салт-дәстүрі мен дастархан мәдениетінің ежелден келе жатқан жарқын үлгісін көрсетті.
Мұндағы мақсат – этнос өкілдерін қоғамдық бастамаларға ұйыстыру арқылы мемлекет құраушы қазақ халқының маңайына топтастыру, ұлтымыздың қонақжайлық, сыйластық сынды игі дәстүрін дәріптеу.
Фестивальге Шымкент қалалық ішкі саясат және жастар істері жөніндегі басқармасының басшысы, қалалық ҚХА жанындағы Ақсақалдар кеңесі, Аналар кеңесі сынды бірқатар қоғамдық құрылымдардың жетекшілері, қалалық этномәдени бірлестіктердің төрағалары, қатысып, ақ дастархан басында арқа-жарқа әңгіме құрды.
Шара барысында қалалық «Салт-дәстүр және әдет-ғұрып орталығының» маманы ұлттық салт-дәстүр мен ұлттық тағамдар туралы, әр астың тарихы, қай қонаққа берілетіні жайлы мағлұмат берді.
Айта кетейік, Қазақстан халқы Ассамблеясының «Қазақтану» жобасы аясында қолға алынған «Қазақ дастарханы» фестивалі алғаш рет 2015 жылы Шымкент қаласында бастау алған болатын.
