Шымкент қаласының Қоғамдық кеңесінің кезекті отырысы өтті. Жиынды Қоғамдық кеңестің төрағасы Бауыржан Әлтеев жүргізді. Аталмыш шараға қоғамдық кеңес мүшелері, тиісті басқарма басшылары және БАҚ өкілдері қатысты. Күн тәртібіне сәйкес Шымкент қаласының жылу беру маусымына дайындық жұмыстарының барысы мәселесі қаралды. Энергетика және инфрақұрылымды дамыту басқарма басшыларының баяндамалары тыңдалып, кеңес мүшелерінің сұрақтарына жауап берілді. Басқарманың айтуынша қала аумағындағы 98% көпқабатты тұрғын үй және бюджеттік мекемелердің 100%-ы жылыту маусымына дайын. Жалпы қаланың 2024-2025 жылдардағы жылу беру маусымына дайындық жұмыстарының барысы бақылауға алынған, апта сайын тұрақты мониторинг жүргізіліп тұрады. Кеңес мүшелері алдағы жылу маусымына алаңдаушылық білдіріп, жылда болатын мәселелер биылғы жылы қайталанбайтынына күмәнмен қарайтындарын айтып, жылу маусымына дайындықты күшейтуді сұрады. Ағымдағы жылдың қаңтар-тамыз айларының қорытындысымен Шымкент қаласына шамамен 402 млрд теңге инвестиция тартылған. Ал 2024 жылы жалпы 813 млрд теңге инвестиция тарту жоспарлануда, бұл көрсеткіш 2023 жылмен салыстырғанда 12%-ға дейін артады. Қоғамдық кеңес мүшесі Т.Нишанбаев ауыл шаруашылығы өнімдерін қайта өңдеуді субсидиялау туралы ұсынысы кеңес мүшелері тарапынан қолдау тауып, жоғарғы мемлекеттік мекемелерге ұсыныс хат жолдау жөнінде шешім шығарылды. Отырыстың соңғы мәселесі бойынша Асанбай Асқаров атындағы дендро саябағының директоры саябаққа келушілерге арналған кіру ақысына қатысты біршама ұсыныстар айтты. Дендрологиялық саябақ басшысына кеңес мүшелері қолдау білдіріп, өз ұсыныстарын айтты. Баяндамашыларға кеңес мүшелері өз тараптарынан тиісті сұрақтар қойып, ұсыныстарды енгізіп, қоғамдық бақылауға алатындықтарын жеткізді.
