Шымкент қаласы жаңа білім нысандарымен толығады. Жалпы 2025 жылға дейін 18 білім нысаны салыну керек болса, биыл оның 12-сі пайдалануға берілмек. Осылай деген білім басқармасының басшысы құрылыс нысандарын аралап, жергілікті тұрғындарға таныстырды. Мұндағы мақсат — ата-аналармен ашықтықты қамтамасыз ету.
Бүгінгі таңда қаладағы 275 мектепте 259 173 оқушы білім алуда. Оның ішінде 17 300 орындық 12 мектептің құрылысы 2023 жылы басталып, ағымдағы жылы аяқталады. Ел игілігіне берілген және берілетін жайлы мектеп оқу құралдары мен жиһаздармен жабдықталса, жаңа модификация кабинеттері де бар. Сондай-ақ, нысанның ішкі-сыртқы қасбетінде «әмбебап дизайн» қағидаты сақталған. Осылай деген қалалық білім басқармасының басшысы үшінші мегаполисте үш ауысымды оқу ошақтарының жоқ екенін атап өтті.
Тұрғындармен кездесу ұйымдастырылған құрылыс нысаны Тұран-2 шағын ауданында орналасқан. 1200 орындық мектептің іргетасын қалау 2023 жылы басталған. Аталған жайлы мектеп жобасы аясындағы құрылысқа тапсырыс беруші мекеме «Самұрық-Қазына» АҚ. Тұрғындарға таныстыру шарасына қатысқан Шымкент қалалық энергетика басқармасының қызметкері инженерлік жүйелерден қандай да бір ақаулықтар анықталған жағдайда дер кезінде шешуге уәде берді.
Жыл соңына дейін 4 мектепке жалпы құны 1,5 млрд теңге көлеміндегі қаржыны құрайтын күрделі жөндеу жұмыстары жүргізіледі.
«Жайлы мектеп» ұлттық жобасы туралы алдымен Мемлекет басшысының Жолдауында айтылды. Дәлірек, 2025 жылға дейін 800 мың баланың заманауи мектепте оқуына жағдай жасай отырып, апатты жағдайдағы және үш ауысыммен оқитын мектеп мәселесінің толық шешілетіні Президент пәрменінде көрсетілген. Бүгінде іс сөз жүзінде қалмай, үшінші мегаполистегі жайлы мектептердің қатары арта түспек.
