ІРІ ЖӘНЕ ҰСАҚ МАЛДАН СЫНАМА АЛЫНДЫ

Эпизоотиялық іс-шараның профилактикасы бойынша төрт түлік пен үй жануарларына 16 түрлі аса қауіпті ауруға қарсы іс-шаралар жүргізілу жоспарлануда. Оның ішінде 13 ауруға қарсы вакцина егілсе, 2 ауруға аллергиялық тексерілу, 1 ауруға дегельминтизация жүргізіледі. Түркістан облысы әкімі аппаратының апталық мәжілісінде осы саладағы жұмыстар мен кемшіліктер талқыланды.

Түркістан облысында Ветеринария басқармасына қарасты «Ветеринариялық қызмет» шаруашылық жүргізу құқығындағы мемлекеттік коммуналдық кәсіпорын жұмыс атқаруда. Аталмыш кәсіпорында 2 мыңға жуық маман бар. Өңір басшысы жауаптыларға жұмысты жандандыруды тапсырды. Дархан Сатыбалды ветеринариялық лабороториялардың жауапкершілігін көтеру және өзге де мәселелерді шешу бойынша нақты тапсырмалар берді. Сонымен бірге Сайрам ауданындағы мал қалдықтарын тастайтындарға қарсы күресті күшейтуді тапсырды.

Түркістан облыстық ветеринария басқармасы басшысы орынбасарының айтуынша, 2024 жылы аса қауіпті ауруларға қарсы 30,9 млн. доза вакцина егу жоспарланып, жыл басынан 15,5 млн. доза вакцина аудан, қала орталығындағы уақытша сақтау қоймаларына жеткізіліп, бүгінгі күнге 6 айдағы жоспардың 78 % орындалған.
2024 жылы «сібір жарасы» ошақтарын күтіп ұстау, залалсыздандыруға жергілікті бюджеттен 4,6 млн теңге қаржы бөлініп, 310 ошақтың 3% каустикалы ерітіндімен залалсыздандырылып, арнайы белгілері орнатылған.
Түркістан облысында Қырым қанды қызбасы ауруына қарсы жұмыс жүруде. Жыл басынан 20 966 бас ит пен мысық чиптеліп, «Танба» дерекқор базасына енгізіліп, есепке алынған. Ветеринария саласын жандандыру бағытындағы жұмыстар жалғасады.