Шымкентте «Zhuldyz Summer Cup» футбол турнирінің шымылдығы түрілді. 19 жасқа дейінгі қыздар арасында ұйымдастырылған халықаралық бәсеке УЕФА футбол қауымдастығының қолдауымен өтіп отыр. Оған шекаралас аумақтағы аяқдоп шеберлері және ел спортшылары қатысады.
Мегаполисте қыздар арасында ұйымдастырылған халықаралық турнирдің салтанатты түрде ашылу рәсімі өтті. Онда Қазақстан Республикасының Мемлекеттік Әнұраны орындалып, қатысушылар көк туға қарап сап түзеді. Байрақты бәсеке Қазақстан футбол федерациясының ұйымдастыруымен және UEFA Assist бағдарламасы аясында өтеді. Жасөспірімдер арасындағы ұлттық құрама бапкерінің айтуынша бұл бастама халықаралық турнирлер қарсаңындағы дайындық шарасы болмақ.
-Бұл турнирде UEFA чемпиондар лигасында жоғарғы нәтиже көрсетіп жүрген шымкенттік «Биік Шымкент» командасының жасөспірімдері және Қазақстан Ұлттық құрамасы бар. Сондай-ақ, Өзбекстан, Қырғызстан ұлттық құрамаларын да шақырдық. Турнирдің басты мақсаты — халықаралық ойын тәжірибесін арттыру және әйелдер футболын дамыту болып отыр. Сонымен қатар, жаңа маусымдағы UEFA қауымдастығының халықаралық турнирлеріне дайындық шарасы болмақ. Бұл кездесулер әйелдер футболын дамытады деп сенеміз және алдағы уақытта өзге өңірлерде де ұйымдастыру жоспарда бар,- дейді Қазақстан футбол федерациясы әйелдер футболы департаментінің директоры Наргиз Магау.
Турнирде 19 жасқа дейінгі Қазақстан, Өзбекстан, Қырғызстан ұлттық құрамалары және «БИІК-Шымкент» командасы қатысады. Басты мақсат — халықаралық ойын тәжірибесін жинау және әйелдер футболын дамыту болып отыр.
Айта кетейік, қатысушылар бір топқа түсіп, 24-28 маусым аралығында өзара кездесулер өткізеді. Дегенмен, бұл жолдастық турнир болғандықтан жарыста ұпай саны есептелмейді, жеңімпаз анықталмайды.-Мұнда 4 команда бақ сынайды. Ойын қорытындысында ұпай жазылмайды. Дегенмен әйелдер футболын арттыру мен тәжірибесін толықтыру мақсатында ұйымдастырылып отыр. Біздің құрамада жас ойыншылар көп. Осындай жолдастық ойындарда жаңа ойыншылардың қарқынын көріп, маңызды ойындарға жоспар құруға мүмкіндік аламыз,-деген футболдан Қазақстан U-19 қыздар құрамасының аға бапкері Орынбасар Дәуренбекова қатысушыларға сәттілік тіледі.
