Шымкентте «Шығармашылық интеллигенция – Қазақстан балаларына» атты балалар газет-журналдарының өкілдерімен *арнайы кездесу* өтті. Іс-шараның мақсаты- қазақстандық балалар журналдары мен газеттері арқылы балалар арасында кітап оқу мәдениетін насихаттау және оқу белсенділігін арттыру.
Шығармашылық кездесуде балаларға арналған газет-журнал редакторлары, мектеп басшылары мұғалімдері, ата-аналар өз ойларын ортаға салып, жаңа тың ойларымен ашық пікір алмасты.
Президентіміздің бастамасымен «Оқуға құштар мектеп» және «Балалар кітапханасы» жобалары жүйелі түрде жүргізіліп келеді. Балалар үшін жасалған ең үлкен жақсылық балаларға арналған жақсы өлең, жақсы әңгіме, жақсы кітап екені белгілі. Балалардың оқуға құштарлығын арттыру үшін ең алдымен балаларға арналған қызықты шығармалар жазылуы керек. Қазіргі кезде Қазақстандық балалар журналдары, «Оқуға құштар мектеп» жобасы, «Балалар кітапханасы» бағдарламасы шеңберінде балалардың кітап оқуға деген қызығушылығын арттыру, жас ақын-жазушылардың шығармаларын, көркем-әдеби кітаптарын, туындыларын қолдауға ықпал ету бағытында маңызды жұмыстар жүргізілуде. Міне сол жұмыстардың бірі бүгінгі өткен кездесу. Кездесуде балалар газет-журналдарының өкілдері ата-аналар мен ұстаздарға баланы кітап оқуға, білім алуға деген қызығушылығын қалай арттыру керек екендігі туралы өз ойларын ортаға салды. Сондай-ақ оқушылар мен студенттердің білімін, оқуы мен жазу сауатын қатаң сынға алды.
Ертеңгі ұрпақ тағдыры толғандырған жандардың барлығы балалаларға арналған кітап, газет-журналдардың жанашыры болуы тиіс. «Артық білім кітапта, Ерінбей оқып көруге» деп өсиет еткен болатын хакім Абай. Қазақстанның халық жазушысы Әбіш Кекілбаевтың «Адамды адам еткен – кітап, адамзат еткен – кітапхана» деген сөзі де әр адамды оқуға құштар болуға шақырып тұрғандай. Шындығында кітап оқуға құштарлық қазіргі қоғамның басты құндылығы болып табылады. Сондықтан да жас жеткіншектерді оқуға құштар азамат етіп тәрбиелеу аса маңызды міндет деп білеміз. Елімізде жалпы адамзаттық және ұлттық құндылықтар негізінде өскелең ұрпақты тәрбиелеу сапасын арттыруға бағытталған 2023-2025 жылдарға арналған «Біртұтас тәрбие бағдарламасы» іске асырылуда. Ендеше оқуға құштарлық білім саласындағы керемет өзгерістердің басы болады деп сенеміз.
